Amed – Gelê Kurd û saziyên Kurdan ku piştgiriyê didin banga Rêberê Gelê Kurd Abdullah Ocalan, destnîşan dikin ku ji bo baweriya wan bi dewletê bê divê dewlet demildest deriyê Îmraliyê veke û Rêberê Gelê Kurd Azad bibe.
Rêberê Gelê Kurd Abdullah Ocalan di 27ê Sibatê de bi navê ‘Aştî û Civaka Demokratîk’ nameyek parve kir û xwest êdî her kes ji bo civaka demokratîk berpirsiyariyê bidin ser xwe. Piştî banga Abdullah Ocalan gelê Kurdistanê û partiyên siyasî yên Kurdan piştgiriyek mezin da bangê. Banga Abdullah Ocalan li qada cîhanê jî bi erênî hat pêşwazîkirin û piştgiriyek mezin girt. Piştî bangê Şandeya Îmraliyê ya DEM Partiyê ewil hemû partiyên li meclisê ziyaret kirin û piştre li Hewler û Silêmaniyê partiyên siyasî ziyaret kirin. Herî dawî şandeyê di 10ê Nîsanê de bi Serokkomarê Tirkiyeyê û Serokê AKPê Recep Tayyîp Erdogan re hevdîtin kir.
Piştî hevdîtinê li ser rewşa pêvajoyê welatiyên Amedê ji Ajansa Welat (AW) re axivîn. Welatiyan diyar kirin ku ew her dem li pişt Rêberê Gelê Kurd in, lê baweriya wan bi dewleta Tirk nayê. Welatiyan xwest ji bo baweriya wan bi dewletê bê divê dewlêta Tirk demildest Rêberê Gelê Kurd Abdullah Ocalan azad bibe.
‘Divê hemû girtiyên siyasî bêne berdan’
Welatî Sûleyman Kizilay diyar kir ku banga Rêberê Gelê Kurd Abdullah Ocalan ji bo Rojhilata Navîn gelek girin e û wiha axivî: “Divê êdî dayîk negirin. Divê hemû girtiyên siyasî bêne berdan. Ji bo pêvajo pêş bikevê divê ne tenê gelê Kurd, divê gelê Tirk jî piştgiriyê bidin pêvajoyê. Aştî ji me tevahan re hewceye. Divê gelê Tirk me baş fêm bike û mil bide milê me. Ji bo aştî pêk bê hêviya me her dem heye. Ji ber ku em têkoşînek mezin didin. Em ji xwe bawer in. Divê her tişt bi gel re bê parvekirin da ku gel ji pêvajoyê û dewletê bawer bike. Ji bo pêvajo pêş bikeve divê em divê em jî bêtir têbikoşin.”
‘Divê Rêberê Gelê Kurd Abdullah Ocalan azad bibe’
Sûleyman Kizilay da zanîn ku azadiya Rêberê Gelê Kurd Abdullah Ocalan azadiya gelê Kurd e û axaftina xwe wiha dawî kir: “Daxwaza Birêz Abdullah Ocalan her dem aştî bû. Îro jî aştiyê dixwazê em jî wekî gelê Kurd li pişt birêz Abdullah Ocalan in. Ew 40 sal e gelê Kurd ji bo aştiyê liberxwe dide. Berê maf û nasnameya gelê Kurd hatiba naskirin dê ev şer pêş neketibûya. Pirsgirêka Kurd ne tenê pirsgirêka me ye. Heta ku Rêberê Gelê Kurd azad nebê kes azad nabe. Heta Abdullah Ocalan fizîkî azad nebe ev pêvajo pêş nakevê. Pêwîst e dewlet gavên şênber biavêje.”
‘Em li pişt Abdullah Ocalan in’
Welatî Sadik Kiliçer diyar kir ku ji bo baweriya dewletê bê divê dewlet gav biavêje û wiha got: “ Em her dem li pişt Rêberê Gelê Kurd Abdullah Ocalan in. Lê baweriya me dewletê nayê. Dewlet dibêje aştî lê hej gelê me tê girtin. Aştî welê nabê. Dewlet bi navê aştiyê dixwazê me bixapîne. Ji ber ku baweriya dewletê re werê divê dewlet gavên fermî biavêje. Girtiyên siyasî û birêz Abdullah Ocalan azad bibe”
‘Divê dewlet gav biavêje’
Welatî Selahattîn Oner jî diyar kir ku gelê Kurd li pişt daxwaza aştiyê ye û axivî: “Divê şer bê rawestanin êdî xwîn neyê rijandin. Ji aştiyê xweştir tiştek nîne. Niha em dibêjin em aştiyê dixwazin lê dewlet êrişê xwe berdewam dike. Em behsa aştiyê bikin divê êriş bisekine. Divê êrişên li ser Rojava û Başûr bê rawestandin. Divê bi tevahiya Kurdan re aştî pêk bê. Divê dewlet her tiştî aşkerê bike ku gel her tiştî bizanê û baweriya gel bi pêvajoyê bê. Divê dewlet gavên çareseriyê biavêje. Daxwaza me ew e ku Rêberê Gelê Kurd Abdullah Ocalan û girtiyên siyasî azad bibin. Divê zimanê Kurdî bibe zimanê fermî.”
