Tirkiyeyê gundên Kefne Mijê û Guherzê yên Dihokê bombebaran kir. Ji ber êrişan li herêmê şewat derket.
Tevî biryara agirbestê ya PKKê jî êrişên dewleta Tirk ên li dijî başûrê Kurdistanê berdewam in. Li gorî nûçeya Rojnewsê; çavkaniyên li herêmê dan zanîn ku artêşa Tirk demek berê gundên Kefne Mijê û Guherzê yên Dihokê bombebaran kir.
Hat ragihandin ku ji ber bombebarana dewleta tirk, li baxçeyên welatiyan û li deverên gund şewat derket. Nehat zanîn ka êriş bi balafirên şer hatiye kirin an bi top û obûsan.
HPGê têkildarî mijarê daxuyanî da
Li gorî nûçeya ANFê; HPGê bi daxuyaniyekê ragihand ku êrişên dewleta Tirk berdewam in. HPGê, da zanîn ku dewleta tirk li dijî qadên wan 5 caran bi teqemeniyên hêza wan a texrîbkirinê zêde, 45 caran bi droneyên teqemenî û gazên kîmyewî lê barkirî, bi sedan caran bi çekên giran, top û obûsan êriş pêk aniye û 43 caran jî bi kepçe û sondajan hewl daye pêş bikeve. HPGê da zanîn ku hêzên wan di çarçoveya parastina rewa de bersiv dane.
