Hevserokê Giştî yê DEM Partiyê Tuncer Bakirhan di komcivîna partiya xwe de bal kişand ser geşedanên li Îranê, Kurdistanê û Rojhilata Navîn û wiha got: “Bila dev jî gotinan dijminane yên li ser Kurdan berdin. Kurd dê li ku çi bikin bi xwe dizanin. Bila kes aqil nede Kurdan.”
Hevserokê Giştî yê DEM Partiyê Tuncer Bakirhan di komcivîna partiya xwe de li Meclîsê li ser geşedanên di rojevê de axivî. Tuncer Bakirhan têkildarî şerê li Îranê didome destnîşan kir ku Rojhilata Navîn ketiye nav krîzên kûrtir û wiha got: “Li Îranê rejîmê tu carî hêza xwe naspêre gelan. Rejîmê çavkaniyên Îranê hemû ji tank û topan re veqetand. Li dijî nasname û baweriya gelan jî tu azadî mîsoger nekir. Kurd û pêkhateyên cuda û muxalîf bi darve kir. Lê bi mudaxileya derve azadî û demokrasî nayê wî welatî. Gelên li wî welatî dikarin azadî û demokrasiyê bînin. Her ku şer gur dibe gelên bindest, jin û zarok jiyana xwe ji dest didin. Divê şer û pêvçûn bi dawî bibin û desthilat û rejîmên zextê li gelan dikin jî biguherin. Em bi vî awayî çawa nêzî şerê li Îranê dibin diyar dikin. Lê bi israr hinek hene li ser navê Kurdan gotinan dikin. Kurdan wek hêzek ku dikarin siberoja xwe diyar bikin nabînin, aqil didin Kurdan.”
Tuncer Bakirhan bal kişand ser kesên gotinan û neheqî li Kurdan dikin û wiha axivî: “Bila dev jî van gotinan berdin. Kurd dê li ku çi bikin bixwe dizanin. Bila kes aqil nede Kurdan. Hefteyeke ku hemû kesan qala Kurdan kir. Beriya vê jî ji ber Rojava hemû kesan dîsa qala Kurdan dikir. Çima her tim cîhan qala Kurdan dike. Bila dewletên herêmê li ser vê yekê bifikirin. Heke Kurd li dewletên lê dijîn ne welatiyên wekhev û azad bin helbet dê qala Kurdan bê kirin. Yên Kurdan weke kesên dikarin bên ‘bikaranîn’ pênase dikin, bila baş bizanibin ên bi înkar û tunehesibandinê li ser Kurdan ferz dikin bila ser vê bifikirin. Bêjin çima dinya qala Kurdan dikin. Ziman, çand û mafên Kurdan nas bikin bila dema li cihekî guleyek teqiya dinya qala Kurdan neke. Avakirina biratiyeke rasteqîn jî di vir de derbas dibe.”
‘Li serok û pêşengên Kurd ên xwedî rûmet binêrin û wan bişopînin’
Tuncer Bakirhan di berdewama axaftina xwe de destnîşan kir ku serok û pêşengên Kurdan li dewletên lê dijîn li çareseriyê digerin û wiha domand: “Birêz Ocalan li ser Îranê gelek caran hişyarî da. Birêz Ocalan got nebin şirîkê şer lê dema hûn tune hatin hesibandin jî bibin yek û xwe biparêzin. Birêz Mesûd Barzanî û Nêçîrvan Barzanî jî heman tişt gotin. Birêz Bafil Talabanî jî heman tişt got. Hemû jî dibêjin Kurd nabin mertalên kesî û ji bo maf û azadiya xwe têdikoşin. Me jî di serî de got; Em piştgiriya êrişên hêzên hegemon nakin lê divê ew rejîm jî biguhere. Me got em li rex têkoşîna jinên Îranê ne. Yên dibêjin em tevgerên Kurd dişopînin bila di serî de serok û pêşengên Kurd ên xwedî rûmet binêrin û wan bişopînin.”
‘Werin em yekîtiya demokratîk a Rojhilata Navîn saz bikin’
Tuncer Bakirhan êrişên rejîma Îranê yên li dijî Başûrê Kurdistanê şermezar kir û wiha got: “Di şer de ye lê tevî vê yekê jî hê jî êrişî Kurdan dike. Beriya êrişî Kurdan bike bila maf û hebûna Kurdan nas bike. Maf û azadiya Kurdan qebûl bike û werin em Rojhilata Navîn demokratîk bikin. Mafê hemû gel û netewan mîsoger bikin û em ronesannsa Rojhilata Navîn ava bikin. Çareserî diyar e. Werin em yekîtiya demokratik a Rojhilata Navîn saz bikin. Di vir de divê dewletên herêmê bi rola xwe rabin. Çima Tirkiye bi vê yekê re pêşengiyê neke? Ev pêvajo firsendeke. Maf û hebûna Kurdan mîsoger bikin û em bi hev re di nava yekîtiyê de bijîn. Gelên Îranê bi salane di bin zextên rejîma molla de dijîn.”
‘Kurd bi hêz û baweriya xwe têdikoşin’
Tuncer Bakirhan destnîşan kir ku Kurd bi hêza xwe ya cewherî sed sal in têdikoşin û wiha dirêjî da axaftina xwe: “Ew hêzên hegemon li ku bûn dema Kurd dihatin dervekirin. Têkoşîna Kurdan nû dest pê nekir. Ji Simkoyê Şikakî heta Qasimlo û Ferzad Kemengeran Kurd li Rojhilat têdikoşin. Kurd xwe naspêrin kesên tênakoşin. Kurd bi hêza xwe ya cewherî sed sal in têdikoşin. Kurd beriya rejîmê jî li wan çiyayan bûn. Ev rejîm jî dê biçe lê dîsa li wan çiyayan Kurd dê hebin. Kurd bi hezaran sal in li ser erdnîgariya xwe dijîn, dixwazin bi ziman, maf û azadiya xwe bijîn. Îran herêmeke ji aliyê netew û baweriyan ve dewlemende. Rejîmeke zextkar nikare mayinde bibe.”
‘Divê ji bo çareseriyê dewlet zûtir gavan biavêje’
Tuncer Bakirhan diyar kir ku divê Tirkiye li dijî xetereyên şer ji bo pêvajoya Aştî û Civaka Demokratîk zûtir gavan biavêje û wiha axivî: “Em dixwazin Tirkiyeyê ji vî şerî biparêzin. Ev welatê me ye jî. Divê pirsgirêka Kurd nebe hinceta şerekî li vir. Ji bo wê divê em çareseriyê zûtir pêk bînin û gavan biavêjin. Divê hemû kes ji wateya pêvajoya aştiyê ya birêz Ocalan daye destpêkirin baş fêm bike. Niha em li ser pira siratê ne. Tu luksa me tune ye ku gavan hêdî bên avêtin. Dema me nema. Divê zûtir gav bên avêtin. Xetere pir mezin in. Lê desthilat hê jî hesabên biçûk dike. Di vê pêvajoyê de ya herî girîng hiqûq û demokrasî ye. Ji aliyekî ve dibêjin bila Ehmed biçin ser peywirê ji aliyê din ve jî dema hiştina qeyiman dirêj dikin. Êdî dawî li vê bînin û bila hevşeredar vegerin ser karê xwe. Divê akademîsyenên aştî dixwazin jî vegerin karê xwe. Ev pêvajo wan jî hilde nav xwe. Biryarên Dadgeha Mafê Mirovan a Ewropa pêk bînin ku Demîrtaş û Yuksekdag bikaribin tev li Newrozê bibin. Em biryarên Dadgeha Mafên Mirovan a Ewropayê û demokrasiyê pêk neynin em dê çawa yekîtiya navxwe mîsoger bikin?”
Tuncer Bakirhan anî ziman ku êrişên li ser Îranê ji aliyê aboriyê ve jî bandor li Tirkiyeyê dike û li ser aboriyê jî got ku ji ber krîza aborî welatî nikarin debara xwe bikin û divê îkramiya cejnê ya taqawîdan qasî muçeya asgarî bibe.
‘Em newrozek dîrokî li dar bixin’
Tuncer Bakirhan ji bo Newrozê jî bang li jin, ciwan û hemû gelên li Tirkiyeyê û Kurdistanê kir û got: “Werin em bi hev re dengê aştiyê bilind bikin û di vê serdema dîrokî de divê tevlibûneke xurt a dîrokî bibe.”
