Baroya Şirnexê diyar kir ku li Girtîgeha Şirnexê mafên girtiyan tên binpêkirin û girtî bi lêdan û îşkenceyê re rû bi rû dimînin.
Baroya Şirnexê têkildarî lêkolînên Komîsyona Girtîgehan a Baroyê ya li Girtîgeha Tîpa T ya Şirnexê li avahiya baroyê daxuyanî da. Baroya Şirnexê di daxuyaniyê de diyar kir ku wan li ser daxwaza malbatên girtiyan komîsyon ava kiriye û ew çûne bi girtiyan re hevdîtin pêk anîne. Her wiha di hevdîtinan de derketiye holê ku girtî bi tundî û îşkenceyê re rû bi rû mane.
Di daxuyaniyê de bi tabyetî jî girtiyê bi navê Nûrûllah Çîn pêkanînên li ser xwe anîne ziman. Li gorî hevdîtina bi Nûrûllah Çîn re; ew dixwaze ji qawîşa girtiyên bêalî derkeve lê rêveberiya girtîgehê tu dem bersiv nade daxwaznameyên wî. Dema ku Nûrûllah Çîn daxwaz kiriye bi gerînendeyê girtîgehê re hevdîtinê pêk bîne bi êrîşa gardiyanan re rû bi rû maye. Her wiha Nûrûllah Çîn ji bo tundiya li ser wî pêk tê protesto bike hewl dide dengê xwe derxîne û vê carê leşker û gardiyan gaza îsotê li odeya wan direşînin û carek din îşkence li girtiyan dikin.
Baroya Şirnexê anî ziman ku wan di hevdîtinên xwe de tespît kiriye ku li Girtîgeha Şirnexê binpêkirinên mafan diqewimin.
Binpêkirinên mafan bi vî rengî ne:
* Mafê hevdîtina bi rêvegeriya girtîgehê re tê astengkirin
* Girtî rastî pêkanînên kêfî û qedexeyan tên
* Li ser girtiyan tundî, lêdan û muameleya nebaş pêk tên
* Li dijî girtiyan tundiya bi gaza îsotê pêk tê
* Dermankirina girtiyên nexweş û birîndar tê astengkirin
* Derveyî hiqûqê cezayê hucreyê tê dayîn
Baroya Şirnexê di dawiya daxuyaniyê de daxwaz kir ku derbarê pêkanînên li ser girtiyan de lêpirsîn were destpêkirin û kesên van pêkanînan dikin werin darizandin.
‘Em ê ji bo pêşîlêgirtina êrişan tişta hewce bikin’
Rêveberê Baroya Şirnex Mendûh Erdem derbarê pêkanînên li ser girtiyan de ji ajansa me re axivî û got: “Li ser daxwaza malbatên girtiyan em çûn girtîgehê. Bi rastî ev pêkanîn nayên qebûlkirin û weke baro em ê ji bo pêşîlêgirtina van êrişan tişta hewce be bikin.”
