Muzaffer Akengîn ku 32 salan girtî ma, ji girtîgehê derket. Malbat, xizm û dostên wî ew li Amedê bi tililî û dirûşmeyan pêşwazî kirin.
Muzaffer Akengîn (56) ku li Girtîgeha Hejmar 1 a Tîpa F a bi Ewlekariya Bilind a Tekîrdagê dihat ragirtin, piştî 32 salan duh hate berdan. Muzafer Akengîn, vegeriya xaka xwe Amedê û li balafirgehê ji hêla malbata xwe û gelek kesan ve bi coşeke mezin hat pêşwazîkirin. Muzafe Akengîn, bi dirûşma “Bijî berxwedana zindanan” hat pêşwazîkirin. Muzafer Akengîn li vir axaftineke kin kir û got: “Gelek hevalên tehliyeyên wan hatine taloqkirin hene. Di serî de girtiyên nexweş û yên tehliyeyên wan hatine taloqkirin, ji bo azadiya tevahiya girtiyên siyasî divê partiyên siyasî û hemû sazî berpirsyartiya dikeve ser milê xwe bicih bînin.”
Piştre Muzafer Akengîn derbasî mala malbata xwe ya li navenda Amedê bû. Dê sibe li Şaxa Komeleya Alîkarî û Piştevaniya bi Malbatên Girtî û Hikûmxwaran re (TUAY-DER) ya Amedê ziyaretan qebûl bike.
Muzaffer Akengîn di sala 1993yan de li Enqereyê hate binçavkirin û cezayê muebbedê lê hate birîn. Diviyabû di 13ê Mijdara 2023yan de bihata berdan lê Lijneya Îdare û Çavdêriyê bi hinceta cezayên disiplînê tehliyeya wî asteng kir. Piştî 32 salan girtî ma, duh hate berdan.
