Saziyên sivîl di çerçovya Hefteya Mafê Mirovan de meş li darxistin. Rêvebera ÎHDê Emîne Ozer Arslanê bal kişand ser Pêvajoya Aştî û Civaka Demokratîk û got: “Aştî pêk were dê ji bo Rojhilata Navîn bibe mînak. Armanc û xwesteka me pêkhatina aştiyê ye.”
Bi pêşengiya Baroya Amedê, Komeleya Hîqûqnasên Ji Bo Azadiyê(OHD), Odeya Bijîşkan a Amedê, Komeleya Mafê Mirovan (ÎHD), Komeleya Jinan ya Rozayê, Weqfa Mafên Mirovan a Tirkiyeyê ya şaxa Amedê (TÎHV) li Qada Şêx Seîd heya Deriyê Sarayê meşiyan. Nûnerên saziyên sivîl, partiyên siyasî, Dayîkên Aştiyê û gelek kes tev li meşê bûn. Pankarta “Aştî bi Mafê Mirovan Pêkan e” hate rakirin. Di meşê de girseyê dirûşmeyên “Jin Jiyan Azadî”, “Em Şer Naxwazin Em Aştiyê Dixwazin” berz kirin. Piştî meşê li Deriyê Sarayê daxuyanî hate dayîn. Daxuyaniya Çapemeniyê Serokê Şaxa ÎHDê Ercan Yilmaz bi Tirkî xwend. Pêşiya destpêkirina meşê me mikrofona xwe dirêjî endama Rêveberiya Komeleya Mafê Mirovan a Şaxa Amedê Emîne Ozer Arslanê kir.
‘Aştî pêk were dê ji bo Rojhilata Navîn bibe mînak’
Rêvebera Komeleya Mafê Mirovan a Şaxa Amedê Emîne Ozer Arslan di derheqê meşê de ev tişt gotin: “ Wekî hûn dizanin 10ê Kanûnê heya 17ê mehê hefteya Mafê Mirovan e. Di vê hefteyê de gelek çalakî yên me yê çê bibin. Yek jî îro em meşê pêktînin. Hûn jî dizanin ku di pêvajoya Aştî û Civaka Demokratîk de dewlet gavan navêje, meşa me ji bo vê yeke pêk tê. Yeke din jî hezaran girtiyên me di girtîgehan de ne. PKKê gelek gavên mezin avêtin ji bo pêvajoyê. Çek şewitandin, hêzên xwe ji aliyê Tirkiyê vekişandin, dewlet ruxmê van gavan, ji gotinan derbas nebûye. Li Tirkiye sedema qeyrana aboriyê ev şer e. Divê gelê Kurd xwe bi zimanê xwe îfade bike. Aştî pêk were dê ji bo Rojhilata Navîn bibe mînak. Armanc û xwesteka me pêk hatina aştiyê ye.”
‘Ji bo pêvajoyê çi destê me bê em ê bikin’
Serokê Şaxa ÎHDê Ercan Yilmaz diyarkir ku li ser navê 60 saziya diaxive. Ercan Yilmaz anî ziman ku di nav aştî û aramiyê de jiyîn mafê mirovan e. Ji bo ku mafê mirovan pêşve biçe divê aştî pêk were. Aştî bi mafê mirovan ve mimkûn e û Ercan Yilmaz berdewam axaftina xwe de ev tişt gotin: “ Herî dawiyê di Cotmeha sala 2024an de pêvajoyek hatiye destpê kirin. Çareseriya vê meseleyê di nav gel de bûye sedema kêfxweşî û kelecaniyê. Em jî ji bo vê yekê kêfxweş in, em li vir dibêjin ku ji bo pêvajoyê çi destê me bê em ê bikin, em ê piştgiriyê bidin pêvajoyê.”
