Nivîskar Şevger Çolo di Pêşengeha Pirtûkan a Amedê de bi cil û bergên xwe û bilûra xwe bala pêşengehê dikişîne ser xwe. Şevger Çolo anî ziman ku ji bo wî çand, xwendin û nivîsandina Kurdî pirr girîng e.
Pêşengeha Pirtûkan a Amedê ya 9emîn li Navenda Kongre û Pêşengehî ya Mezopotamyayê ya Navneteweyî 18ê Cotmehê hatibû destpêkirin. Li pêşengeha pirtûkan de gelek weşangeh û nivîskar cîh girtin. Nivîskar Şevger Çolo jî di pêşengehê de bi cil û bergên xwe yên Kurdî û bilûra xwe bala weşanger, nivîskar û xwîneran dikişîne ser xwe. Şevger Çolo bi denge bilûra xwe xwîner û nivîskarên Kurd kêfxweş kir. Şevger Çolo derheqê cil û bergên xwe pêşengehê de axivî.
‘Em dikarin bi xwendinê pêş bikevin’
Nivîskar Şevger Çolo diyar kir ku ew ê dest ji çanda xwe û nivîsandina Kurdî bernede û her dem dê şopînerê ziman û çanda Kurdî be. Şevger Çolo bal kişand ser atmosfera pêşengehê û eleqeya ji pirtûkên Kurdî û got: “Ez hinekî zimanê Almanî, Îngîlîzî û Tirkî baş dizanim lê dirûşmeyeke min heye ez li gel Kurdan nizanim Tirkî biaxivim tenê gel Tirkan dizanim Tirkî biaxivim. Derfetê min çêbû ez hatim Pêşengeha Pirtûkan a Amedê lê li gorî çavdêriya min di bajarekî wisa mezin de li ser dezgehan bi hezaran pirtûkên Kurdî hene û bêxwedî dimînin. Mixabin çanda me ya civaka Kurd a xwendina pirtûkan hinek kêm e. Divê em vê rastiyê ji bîr nekin, em dikarin bi xwendinê pêş bikevin. Erê dîsa jî xwîner ji bajarên dûr tên lê belê ev têr nake.”
‘Divê em xwendinê bikin mijareke civakî’
Şevger Çolo her wiha bal kişand ser giringiya xwendina bi Kurdî û kêmasiya eleqeya li hemberî pirtûk û weşangerên Kurdî û wiha got: “Divê em xwendinê bikin mijareke civakî. Gelek weşanxane, gelek pirtûkên hêja yên ji aliyê dîrokê û ji aliyê ziman ve pirtûkên pêşketî hene, lê belê bêxwedî mane, wekî gazinca me ye ji bo hemû civakê. Tenê ne li vê pêşengehê mixabin li hem û pêşengehan vê rewşê dibînim. Xwezî gelê me bêtir hez ji xwendina bi zimanê xwe bikira. Pirtûkên Kurdî bîr, bawerî û şiyar bûn e. Ji bo wê hinekî xemginiya min heye lê dîsa jî kedekî heye. Weşanger û nivîskar kedek mezin didin û kêm be jî eleqeyek heye. Ez bawerim di rojên din ên pêşengehê de dê eleqeya ji bo pirtûkên Kurdî zêde bibe.”
‘Divê civak çanda xwe biparêze’
Şevger Çolo diyar kir ku di pêşengehê de hem xwîner hem jî nivîskarên Kurd bi eleqeyek mezin nêzî cil û bergên wî yên bi Kurdî dibin û axaftina xwe wiha bi dawî kir: “Ev yek jî min pirr kêfxweş dike. 20 sal in ez her tim cil û bergên Kurdî li xwe dikim. Ev çoxê ku min vergirtiye ne yê herema me ye yê herema Rojhilatê Kurdistanê ye, çanda Kurdî pirr xweşik e. Min cil û berg ji Rojhilat anî. Şal û iepikên min jî yê Cizîrê ne, Botanî ne. Ez cil û bergên xwe sînordar nakim, hemû cil û bergên Kurdî çanda min in. Divê em li her derê çanda xwe zindî bikin, nehêlin ku bê jibîrkirin û biparêzin. Em çanda xwe di hest û laşê xwe de bicih nekin, ev çand nayê parastin û emrê wê kurt dibe. Divê civak jî çanda xwe biparêze.”
