Di pêşengiya TJA, DBP, DEM Partî û rêxistinên civakî de li Nisêbîn, Sêrt, Erzirom û Bêdlisê bi hezaran kes daketin kolanan û êrîşên li ser Rojava şermezar kirin.
Piştî HTŞê Heleb, Hama, Hems û Şam dagir kir, hêzên çete yên wekî ANS, Sultan Murard, Ceyş El Watan û gelek komên din êrîşên xwe yên li ser Rêveberiya Xweser a Rojava zêde kirin. Li dijî van êrîşan gel li gelek bajaran daketin kolanan û çalakî li dar xistin.
Nisêbîn
Nûner û rêveberên DBP), DEM Partî û TJAyê li navçeya Nisêbînê ya Mêrdînê bi meşekê çalakî li dar xist. Parlementerên DEM Partiyê û nûnerên saziyan ewil serdana esnafan kirin û bangawaziya xwedîlêderketina gelên Bakur û Rojhilatê Sûriyeyê li gel kirin. Piştî serdana esnafan bi sedan kes li pêşiya mala serxweşiyê ya Newrozê kom bûn û heta Qada Newrozê bi dirûşmeyên “Bijî berxwedana Rojava”, “Rojava dilê me, berxwedan e karê me” û “Gelê Rojavayê ne bi tenê ye” meşiyan. Di meşê de pankarta “Bi ruhê seferberiye em ê şoreşa Rojavayê biparezin” vekirin. Ewil Hevserokê Bajêr ê DEM Partiyê Mehdî Tûnç kir û got: “Rojava ji bo me mijara rûmetê ye. Rojava ji bo mijara nasnameyê ye. Rojava ji bo mijara hebûn û nebûnê ye.”
Parlamentera DEM Partiyê Ayten Kordû jî diyar kir ku ew ê rê nedin li Sûriye û Rojava komkujî were kirin û got: “Em ê têkoşîna xwe heta hetayê bidomînin. Tam li vir, li ser van sînorên çêkirî, bi hemû kes û karên xwe re, bi xwişk û birayên xwe re, wek gelê Kurd, wek jin em ê li dijî vî şerî derkevin. Em ê jiyaneke azad û wekhev teqez dabîn bikin. Ji ber vê yekê Jin Jiyan Azadî.”
Piştî axaftinan gel derbasî pêşiya Navenda Çandê ya Mîtaniyê ya li ser sînorê Qamişloyê bûn. Girseyê li vir bi dirûşmeyan dest bi nobedê kir. Girseyê di nobetê de stran gotin û bê navber bi dirûşmeyan piştgiriya xwe ya berxwedana Rojava anîn ziman.
Sêrt
Li navçeya Misircê ya Sêrtê li dijî êrîşên dagirkeriyê çalakî hat lidarxistin. Girse bi pêşengiya DBP, TJA û DEM Partiyê li ber avahiya DEM Partiyê ya Misircê kom bû. Girseyê pankarta “Rojava rûmeta mîrovahiyê ye, Rojava diparêze” vekirin û timî dirûşmên “Bijî berxwedana gelê Kurd”, “Ji şer re na, aştî niha”, “Bijî berxwedana Rojava” û “Bi berxwedanê em ê bi ser bikevin” hatin berzkirin. Girse bi çepik, dirûşme û tilîliyan heta birca saetê meşiyan. Hevserokê DEM Partiyê yê Sêrtê Eşref Tekîn bertek nîşanî êrîşên li ser Bakur û Rojhilatê Sûriyeyê da. Tekîn nîqaşên li ser pêvajoya çareseriyê bi bîr xist û diyar kir ku ger behsa aştiyê bê kirin, divê destpêkê ji Rojava dest pê bikin.
Daxuyanî bi dirûşmeya “Bijî berxwedana Rojava” bi dawî bû.
Erzirom
Li Erziromê bi pêşengiya DBP ya Erziromê daxuyanî hat dayîn. Di daxuyaniyê de hat destnîşankirin ku çareserî ne bi polîtîkayên înkar û şer, bi diyalogê pêkan e. Hevserokê DBP’ê yê Erziromê Abdullah Ala daxuyanî xwend û got, “Êrîşên li ser Rojava aloziya Sûriyeyê hîn kûrtir dike. Em baş dizanin ku modela jiyana demokratîk a Rojava hedef tê girtin.”
Piştî daxuyaniya çapemeniyê dirûşmên “Jin, Jiyan, azadî” û “Bijî berxwedana Rojava” hatin berzkirin.
Bêdlis
Li navçeya Tetwan a Bedlîsê jî meş û daxuyaniya çapemeniyê hat lidarxistin. Hevşaredarên Tetwanê, rêveberên DEM Partiyê yên Mûşê û gelek kes bi pêşengiya DEM Partî ya Bedlîsê esnafan ziyaret kirin û der barê êrîşan de agahî dan. Piştre gel heta ber avahiya DEM Partiyê meşiyan û bê navber dirûşmên “Bijî berxwedana Rojava” û “Gelê Rojava ne bi tenê ye” hatin berzkirin.
Girse li ber avahiya rêxistina navçeyê daxuyaniya çapemeniyê da. Hevserokê DEM Partiyê yê Bedlîsê Fîkret Bîrlîk di çalakiyê de axivî û got, “Desthilatdariya AKP-MHP’ê van komên çete beralî dike. Divê dev ji xwedîkirina van çeteyan berdin. Piştevaniya gelê Kurd bikin. Gelê Rojava rûmeta me ye û em ê her tim biparêzin.”
Daxuyanî bi berzkirina dirûşmeyan bi dawî bû.
