Mêrdîn – Li navçeya Şemrexa Mêrdînê bi meşeke girseyî serdana şîna Endamê Komalên Ciwan Arjen Yavûz (Çiya Rizgar) hat kirin.
Ji bo Endamê Koordînasyona Komalên Ciwan Arjen Yavûz (Çiya Rizgar) ku ji ber nexweşiya penceşêrê di 25ê Tebaxê de jiyana xwe ji dest dabû, li taxa Poyraz a navçeya Şemrexa Mêrdînê şîn hat danîn. Tevî malbata Arjen Yavûz, Parlamentera DEM Partiyê ya Mêrdînê Berîtan Guneş endam û rêveberên Komeleya Hevgirtin û Alîkariyê ya di Derguşa Şaristaniyê de Xizmên Xwe Winda Kirine re (MEBYA-DER), Dayikên Aştiyê, Rêveberên DEM Partî û Partiya Herêmên Demokratîk (DBP), Endamên Meclisa Ciwanan a DBPê, û gelek welatî ji Parka Narîn ber bi Mala Şînê ya Taxa Poyraz ve meş li dar xistin.
Di meşê de dirûşmên “Li çiya negere, Apocî li her derê ne”, “Bê Serok jiyan nabe”, “Şehîd namirin” hatin berzkirin û pankarta li ser “Bi sond û peyman em şopdarê te ne” hat vekirin û wêneyên Rêberê Gelê Kurd Abdullah Ocalan, Huseyîn Akdogan (Armanc Kerboran) û Arjen Yavûz hatin hilgirtin.
Piştî meşê Parlamenter Berîtan Guneş, dayika Arjen Yavûz Ayten Yavûz Endamên Meclisa Ciwanan ên DBPê Hevserokê MEBYA-DERê Salîh Kûday li ser têkoşîn û jiyana Arjen Yavûz axivîn û diyar kirin ku ew ê bibin şopdarê têkoşîn û bîranîna Arjen Yavûz.
Girse piştî axaftinan derbasî mala şînê bû.
