Meclîsa Gel a Şêxmeqsûd û Eşrefiyê têkildarî êrişên li ser taxên wan daxuyaniyek da û got: “Me biryar daye ku em li taxên xwe bimînin û parastina taxên xwe bikin.”
Meclîsa Gel a Taxên Şêxmeqsûd û Eşrefiyê têkildarî êrişên komên çete yên girêdayî HTŞê û Tirkiyeyê, daxuyaniyeke nivîskî belav kir.
Daxuyaniya Meclîsa Gel bi vî rengî ye:
“Ji roja 6’ê Çileyê ve li ser taxên me êrişeke bi çekên giran û bombaraneke dijwar tê kirin. Di van êrişan de mizgeft, dibistan, misteşfe, malên sivîlan û saziyên xizmetguzariyê bi temamî hatin hedefkirin.
Gelê me û hêzên me yên asayîşê li dijî van êrişan berxwedaneke mezin nîşan didin.
Bi van êrişan tê armanckirin ku li dijî gelê me yê van taxan ku bi sedan sal e li van taxan dijî û niştecihên van taxan in, qetlîam û pêleke nû yê koçberiyê bidine destpêkirin. Anku tê xwestin ku demografiya bajêr û taxên me were guhertin. Her wiha ev êriş bi her awayî tê wateya têkbirina peymana 1’ê Nîsanê û îhlalkirina wê.
Hikûmeta demkî ya Şamê van êrişan di bin navê Artêşa Sûriyeyê ya nû de û bi piştgiriya dewleta Tirk û çeteyên girêdayî wê pêk tîne û ji vê cesaretê digire. Her wiha em bêdengiya hêzên navneteweyî yên ku ji bo peymanên 10ê Adarê û 1ê Nîsanê wek garantor û çavdêr amade bûn jî bi tundî şermezar dikin.
Xetereya komkujiyê dewam dike
Êriş û xetereya komkujiyê ya li dijî gelê me yê Şêxmeqsûd û Eşrefiyê heta niha jî dewam dikin.
Bangewaziya ku hêzên hikûmeta demkî a Şamê ji bo gel û hêzên me yên asayîşê dikin, sepandina teslîmbûnê ye, lê gelê me yê van taxan ji bo ku li taxên xwe bimîne û parastina taxên xwe bike, bi biryar e.
Di rewşa heyî de li cihê ku çete bi pêş de hatine li dijî sivîlan qetlîam têne kirin. Anku heman kiryar û qetlîama ku li dijî Elewî û Durziyan hatiye kirin, li taxên me jî tên kirin.
Dixwazin gel ji taxan derkeve
Her kes dizane li van taxan bi sed hezaran sivîl hene û di encama bombebarana giran a li dijî sivîlan de bi dehan birîndarên me çêbûne. Gelek ji van birîndaran jin û zarok in. Nexweşxaneya me ya taxê ya bi navê Xalid Fecir ku ji xwe derfetên xwe pir kêm bûn jî, rastî êriş û bombebarana giran hat. Ev sûcê şer îfade dike. Di rewşa heyî de neweşxane bi temamî ji xizmetê derketiye. Bi tu awayî derfetên ku birîndar werin dermankirin li taxên me nemane. Di warê mirovî de krîzeke cidî heye. Wekî raya giştî jî dizane, ev demeke dirêj bû ku taxên me di dorpêçê de bûn û ketina taxê ya pêdiviyên mirovî dihate astengkirin. Her wiha zivistan rewşa heyî hîn girantir dike.
Di encamê de hêzên hikumeta demkî tevî çeteyên xwe banga radestbûnê li taxên me dikin û dixwazin gel ji van taxan derkeve. Her wiha teslîmbûna hêzên me yên asayîşê tê xwestin.
Em ê taxên xwe biparêzin
Em wek rêveberiya Meclisa Şêxmeqsûd û Eşrefiyê zextên li ser gelê xwe û taxên xwe qebûl nakin. Ji ber kiryarên hikumeta Şamê ya ji hatina ser desthilatê heta niha ku li dijî pêkhate û cihêrengiyên cuda yên Sûriyeyê pêk anîne û bi taybet jî bombebarana ketober û qetlîmanên li dijî gelê me yê ku di van çend rojên dawî de pêk anîne, baweriya me nîn e ku em ewlekariya xwe û taxên xwe radestî wan bikin. Ji bo vê jî ne mimkun e ku em di aliyê girtina ewlekariya taxên xwe de paşde gavan biavêjin. Me biryar daye ku em li taxên xwe bimînin û parastina taxên xwe bikin.
Banga seferberiyê
Herî dawî jî em bang li gelê xwe yê Şêxmeqsûd û Eşrefiyê dikin ku berê xwe bidine Nexweşxaneya Xalid Fecir ku li birîndarên xwe xwedî derkevin û ji bo parastina taxên xwe seferber bibin.”
