Koma Amed piştî 30 salan li Amedê konser da. Bi sed hezaran kes tev li konserê bûn. Hevserokê DBPê Keskîn Bayindir diyar kir ku Azadiya Rêberê Gelê Kurd Abdullah Ocalan azadiya gelê Kurd e.”
Koma Amed piştî 30 salan li Qada Newrozê ya Amedê konsereke bi coş da. Konser bi pêşengiya Şaredariya Bajarê Mezin a Amedê, Sanatça Organîzasyon û Şaredariya Peyasê, bi dirûşma “Kulîlkên Azadiyê Pêşwaziya Aştiya Civakî Dikin” hat da. Bi sed hezaran kes tev li konserê bûn. Girse bi saetan beriya testpêka konserê herikî Qada Newrozê û heta ku konser dest pê bike govend gerand.
‘Dengê Evdil Melîk Şêxbekir hê jî di guhên min de ye’
Piştî rêzgirtinê peyama Hevşaredarê Bajarê Mezin ê Amedê yê berê Selçûk Mizrakli ku li Girtîgeha Edîrneyê tê ragirtin hat xwendin. Selçûk Mizrakli diyar kir ku dengê şehîd Evdilmelîk Şêx Bekir hê jî di guhê wî de ye û got: “Em ê di rojên azad de li qada azadiyê stranên Koma Amed guhdar bikin.”
Hevserokê berê yê HDPê Selahattîn Demîrtaş jî peyam şand û got: “Em ê di rojên azad de werin gel hev.”
Di konserê de peyamên bi dîmen ên hunermend Şivan Perwer, Hesen Şerîf, Hozan Şemdîn, Xelîl Xemgîn, Îlkay Akkaya, Hozan Dilovan û Gulistn Perwer hatin temaşekirin.
Paşê Hevşaredarên Bajarê Mezin ên Amedê derketin ser dikê û gel silav kir. Serra Bucakê diyar kir ku gelê Kurd dixwaze wekhev bijî û got: “Ez hêvî dikim ku ev konser bibe sedema aştiyê.”
‘Azadiya Rêberê Gelê Kurd Abdullah Ocalan azadiya gelê Kurd e’
Dû re Hevserokê Partiya Herêmên Demokratîk (DBP) Keskîn Bayindir axivî û diyar kir ku Koma Amed piştî 30 salan li vê qadê ye lê hevalên ku 30 salan di girtîgehê de hatin girtin jî li vir in û got: “Di şexsê Selçuk Mizrakli de ez tevahî girtiyên siyasî silav dikim. Silav ji Rêberê Gelê Kurd Abdullah Ocalan re. Ji bo azadiya gelê Kurd em hatin vê qadê. 30 sal derbas bû, piştî 30 salan Koma Amed li paytexta welatê xwe ye. Ev peyam ji rayedarên devletê re ye; 30 sal, 300 sal jî derbas bibe dê têkoşîna gelê Kurd berdewam bike. Em ê azadiya fizikî ya Rêberê Gelê Kurd li vir pêşwazî bikin. Em bi Rêber Ocalan bawer in, em bi têkoşîna gelê Kurd bawer in. Dê ev pêvajo bi ser bikeve. Her çiqas devlet piştgirî nede pêvajoyê jî, bi Rêberê Gelê Kurd Abdullah Ocalan û gelê Kurd em ê bi ser bikevin. Sibê dê daxuyaniyeke girîng were parvekirin. Divê dewlet jî piştî vê baş tevbigere. Gelê Kurd bi Rêberê xwe bawer e. Azadiya Rêberê Gelê Kurd Abdullah Ocalan azadiya gelê Kurd e.”
Paşê Koma Amed derket ser dikê û stranên xwe got.
Endamên komê yek bi yek girse silav kirin.
Suleyman Çarnewa ev tişt anî ziman: “Bila kes nemire, em birînên xwe derman bikin. Îro cejna me ye. Di şexsê me de hunera Kurdî pêşwazî kirin.”
