Li Amedê duh cejna Newrozê bi tevlebûna sed hezaran hat pîrozkirin. Di Newrozê de peyamên xurt hatin dayîn. Lê rojnameyên çapemeniya desthilatê cih nedan Newrozê û nûçeya Newrozê sansur kirin.
Newroza Amedê di 21ê Adarê de li Parka Newrozê bi tevlêbûna sed hezaran bi dirûşma “Rêbertiya Azad Civaka Demokratîk” bi coşeke mezin hat pîrozkirin. Di pîrozbahiyê de peyama çareseriya demokratîk û daxwaza azadiya fizîkî ya Rêberê Gelê Kurd Abdullah Ocalan derket pêş. Lê rojnameyên medya hawiz û desthilatê qet cih nedan pîrozbahiya Newroza Amadê û nûçeya Newrozê sansur kirin. Ji rojnameyan tenê Sozcu û Karar cih dan Newrozê. Lê rastiya Newrozê berovajî kirin. Manşetên çend rojnameyên medya desthilat wiha ne:
Rojnameya Hurriyetê di manşeta xwe de cih da gefên Erdogan ên li dijî CHPê û qet cih neda pîrozbahiya Newroza Amedê. Rojnameya SABAHê jî di rûpela manşetê de cih da sedema operasyona li dijî Şaredarê Stenbolê Ekrem Îmamoglu û Newroza bi heybet a li Amedê hat pîrozkirin nedît. Rojnameya Sozcu jî di manşetê de cih da planên qeyûm ên li dijî Şaredariya Stenbolê û bi du hevokan cih da Newroza Amedê. Rojnameya Sozcu, dîsa ji bo rêxistinê peyva ‘terorist’ bikar anî. Rojnameya Cûmhûriyetê jî di manşetê de cih da Kongreya li dijî qeyûman a CHPê û bal kişand ser darbeya qeyûm a li dijî şaredariya Stenbolê. Cumhuriyetê qet cih neda pîrozbahiya Newrozê.
Rojnameya Tirkiye, Yenî Şafak, Akşam, Mîllîyet, Akît û rojnameyên din jî cih nedan Newrozê. Rojnameya Karar cih da Newroza Amedê, lê bal kişand ser nexwendina peyama Rêberê Gelê Kurd Abdullah Ocalan. Rojnameya Karar ji bo girseyê got ‘Gelek welatî beşdarî pîrozbahiyê bûn.’
