Amed – Hevsereka Giştî ya DBPê Çîgdem Kiliçgun Uçar derheqê peymana di navbera HSDê û hikûmeta Şamê pêk hat de axivî û got ku di encama berxwedana gelê Kurd de peyman hate ragihandin û li Rojavayê Kurdistanê siyaseta înkarê ji holê hat rakirin.
Hevseroka Giştî ya Partiya Herêmên Demokratîk (DBP) Çîgdem Kiliçgun Uçar derheqê peymana di navbera HSDê û Şamê de ji Ajansa Welat re axivî. Çîgdem Kiliçgun Uçar got: “Piştî vê peymanê ez dikarim bejim ku ji aliyê Kurdîstanê ve sîyaseta înkarê tê rakirin. Di çarçoveya paradîgmaya birêz Ocalan de berxwedana HSDê û gelê Rojava û hemû Kurdan a li çar parçeyan û dostên Kurdan encamek erên bi xwe re anî.”
‘Hêzên hegemon xwestin şerê Kurd û Ereb derxin’
Çîgdem Kiliçgun Uçar diyar kir ku agirbest û peymana di navbera Kurdan û hikûmeta demkî de hat mohrkirin di çarçoveya banga Rêberê Gelê Kurd Abdullah Ocalan ya 27ê Sbata 2025an de pêk hatiye û wiha got: “Nêzê meheke ku li Sûriyeyê li ser gelê Kurd şereke giran heye. Di ser banga birêz Ocalan de salek derbas bû û em tên ba hev û pirsa dê meseleya Kurd çawa çareser bibe ji hev dikin. Me dît ku dewleta Tirk dixwaze vê pêvajoya aştî û civaka cemokratîk bi şerê Sûriyeyê berdewam bike. Me dît ku şerê li Sûriyeyê tê kirin ne tenê di navbera HTŞê û HSDê de dibe. Di nava vê şerî de hejmareke zêde dewlet hene. Ev şer di navbera jinan û desthilatdariya zilamperestan de ye. Ev şer di navbera dîktatoriyê û azadiyê de ye.
Hêzên desthilatdar û hegemon xwestin ku di navbera Kurd û Ereban de şer çêbe. Xwestin şerê li Sûriyeyê bikin şerê navxweyî yê Sûriyeyê. Lê wisa nebû. Ji wê rojê heta bi îro nûnerên Kurdan, HSDê şer nexwest û ji bo li dora maseyek bên gel hev û mijarê muzakere bikin xebitîn. Li serr vê jî rê li ber çareseriyê vekirin.”
‘Berxwedana Kurdan bi ser ket’
Çigdem Kilicgun Uçar bal kişand ser berxwedana Kurdan û dostê wan û got: “Di nava vê mehê de li Sûriye û Rojava, li Tirkiyeyê, li Rojhilat û Başûr û li her derê cîhanê Kurd û dostên xwe daketin kolanan û helwesat xwe bi berxwedanê eşkere kirin. Gelê Kurd û dostên xwe bi vê berxwedanê gotin ku ew destûr nadin şer çêbibe.
Tişteke din jî heye ku heta îro rêberên Kurdan piştî berxwedanê dihatin darvekirin. Lê îro pêvajoya nû li pêşiya gelê Kurd heye. Bi berxwedana gelê Kurd maseya muzakereyê hat danîn û rêberê Kurdan li hêleke maseyê cihên xwe girtin. Rêberê Gelê Kurd û HSDê di vê de israr kirin û ji bo çareseriyê maseya muzakereyê danîn û li ser vê maseyê jî bi ser ketin. Ev mesele ne meseleya rojek û du rojan e. Meseleyeke giran e. Kîjan dewlet vê meseleye bi rêyên demokrasiye û aştiyê çareser kirin e wan jî qezenc kiriye.”
‘Dewleta Tirk xwest ev pergal têk biçe’
Çîgdem Kiliçgun Uçar diyar kir ku gelê Kurd xwedî li pergala demokratîk ya Rojava derdikeve û wiha axivî: “Ev pergal bi berdêlên giran ên deh salan hat avakirin. Li dij vê jî komên çete û dewleta Tirk hewl didin ku vê pergalê ji holê rakin. Peymana hate çêkirin encamek baş e. Gel û rêxistinên xwe pergala Rojava bi dest û neynûkên xwe, bi ked û xwêdana xwe ava kirin. Dewleta Tirk û dewletên din û li gel hikûmeta demkî ya Şamê xwestin ku vê pergalê hilweşînin. Di encamê de heqê gelê Kurd û gelên li Sûriyeyê winda bikin. Di cihê vê de dîktatoriyê ava bikin. Lê hem berxwedana gelê Kurd û hem jî berxwedana dostên Kurdan destûr neda ev pêk bê. Me vê hem di encama agirbestê de dît û hem jî di encama şer de dît.”
‘Bi vê peymanê siyaseta înkarê ji holê hat rakirin’
Çîgdem KiliçgunUçar di dawiya axaftina xwe de li ser wateya peymanê rawestiya û got: “Rastiya derketiya holê ew jî ev e; li parçeyeke Kurdistanê ya din jî siyaseta înkarê hat rakirin. Vê agirbestê hem pêşî li heqê gelê Kurd û li heqê gelên di ên li Sûriyeyê vekir. Heta niha em li ser entegrasyonê xeber didin. Wisa dixuye ku pêkhatina vê agirbestê dê rê li ber naskirina statuya gelê Kurd û entegrasyona demokratîk jî veke. Hem paradîgmaya birêz Ocalan, hem jî keda gelên Rojava û HSDê encama dixwest, pêk anî.
Îro ji mere çi lazim e em bêjin; yekîtiya gelê Kurd û dostên xwe pir tişteke pêwîst e. Em dîsa çalakiyên xwe yên demokratîk, ji bo Rojava û pêşeroja xwe dengê xwe bilind bikin. Tişta ku em zanin ev agirbest ne tenê Rojava û gelê Kurd re ji gelên li Sûriyeyê re jî demokrasî û azadî bîne. Hem jî dê li Rojhilata Navên bingeha demokrasiye û aştiyê xurt bike.”
