PYD û ENKS beriya konferansa ku dê di 20ê Adarê de bê lidarxistin, civiyan. Civîn piştî nîqaşan bi dawî bû.
Di 16ê Adarê de ji bo nirxandina geşedanên li Sûriyeyê û her wiha xebatên yekitiya Kurdan, ji bilî ENKSê partiyên Kurdan ên li Bakur û Rojhilatê Sûriyeyê bi beşdariya hêzên civakî û siyasî civînek li dar xistibû. Yek ji mijarên serekê yên civînê jî nîqaşkirina xebatên lidarxistina konferanseke partî û hêzên Kurdan bû. Piştî civînê, partiyên siyasî daxuyaniyek dabû. Di daxuyaniyê de hatibû diyarkirin ku wan li ser belgenameyeke siyasî nîqaş kirine. Di belgenameyê de nêrînên Partiyên Yekitiya Neteweyî ya Kurdî (PYNK) û partiyên derveyî wê, her wiha yên ENKSê cih digirin.
Li gorî daxuyaniyê, li ser daxwaza ENKSê ku xwestiye civîneke taybet bi Partiya Yekitiya Demokratîk (PYD) re pêk bîne, hemû partiyên li derveyî wan ji bo pêkanîna yekitiyê ev yek qebûl kiriye. Li gorî nûçeya ANHAyê, îro di navbera PYD û ENKSê de civînek ji çapemeniyê re girtî hat lidarxistin. Hat zanîn ku civîn erênî bi dawî bûye.
Di 20ê Adarê de dê konferans bê lidarxistin
Her wiha li gorî agahiyan komîteyê dane, dê di 20ê Adarê de li Qamişloyê konferansek were lidarxistin.
