Serdozgeriya Komarê ya Stenbole li dijî rêxistinên ciwanan biryara binçavkirinê dabû. Dadgehê ji kesên hatibûn binçavkirin, 2 jê zarok 17 kes girtin û şandin girtîgehê.
Polîsan di çarçoveya lêpirsîna ku ji aliyê Serdozgeriya Komarê ya Stenbolê ve tê meşandin de, bi ser gelek malan de girt. Polisan di serdegirtina malan de Endamên Meclisa Ciwanan a Kongreya Demokratîk a Gelan (HDK), Meclisa Ciwanan a Partiya Wekhevî û Demokrasiyê ya Gelan (DEM Partî), Meclisa Xwendekarên Azad a Stenbolê (ÎSOM), Federasyona Komeleyên Ciwanên Sosyalîst (SGDF) û Jinên Ciwan ên Azad (OGK) jî di nav de 18 kes binçav kirin.
Polîsan 18 kesên ku bi îdiaya “endamên rêxistinê ne” binçav kirin, piştî karên li midûriyeta polîsan qediya sewqî Edliyeya Çaglayanê ya Stenbolê kirin. Serdozgeriyê 18 kes bi daxwaza girtinê sewqî Dadgeriya Cezayê Sulhê kir. Dadgeriyê bi îdiaya “endamên rêxistinê ne” der barê 2 jê zarok 17 kesan de biryara girtinê da û kesek jî bi şertê kontrola edlî serbest berda.
Ciwanên ku biryara girtinê şermezar kirin bênavber dirûşmên “Zext nikare me bitirsîne” û “Bijî berxwedana zindanan” berz kirin.
