Dadgeha Îstînafê ya Îzmîrê ceza li stranbêj Kasim Taşdogan birî. Dadgehê 10 meh ceza li strana “Ronahî û Bêrîvan” û “Hatin” û 10 meh ceza jî li strana “Serhildan Jiyan e” birî.
Stranbêj Kasim Taşdogan ji ber stranên ku gotiye tê darizandin. Kasim Taşdogan li gel civatek hevalên xwe stranên bi navê “Ronahî û Bêrîvan” û “Hatin” ên Koma Amedê dibêje. Ev stran li cihekî jî nehatine parvekirin. Lê belê welatiyek ji wê civatê dema tê bi ser mala wî de tê girtin polîs ew desteser dikin û dest datînin ser telefona wî. Di telefonê de videoya Kasim Taşadogan ku her du stranan dibêje tê destesrkirin. Serdozgeriya Komarê ya Çanakkaleyê di sala 2022yan her du stranan dike hincet û bi îdiaya “progandaya rêxistinê kiriye” doz li Taşdogan vedike. Paşê dozê dişîne 20emîn Dadgeha Cezayê Giran a Îzmîrê.
Her wiha Taşdogan di pîrozbahiya Newroza Qersê ya sala 2023yan de strana “Serhildan Jiyan e” dibêje û Serdozgeriya Qersê ji ber stranê bi îdiaya “Propaganda rêxistinê kiriye” dozê li Taşdogan vedike.
20emîn Dadgeha Cezayê Giran Îzmîrê dosyeya Çanakkaleyê û dosyeya Qersê kir yek û darizandinê berdewam kir.
20emîn Dadgeha Cezayê Giran der barê Kasim Taşdogan de biryara beraetê da û bêyî hewceyî bi parastinê bibîne, biryarê şand Dadgeha Îstînafê ya Herêma Îzmîrê. Dadgeha Îstînafê biryara beraetê xera kir û daxwaz kir ku Taşdogan ji nû ve bê darizandin.
Piştî xerakirina dosyeyê îro danişîna biryarê dozê li 2yemîn Daîreya Cezayê Dadgeha Îstînafê ya Îzmîrê hat lidarxistin. Taşdogan û parêzerên xwe Zafer Încîn beşdarî dozê bûn.
Ceza li sê stranan hat birîn
Kasim Taşdogan û parêzerê xwe Zafer Încîn di danişînê de parastina xwe kirin û daxwaza beraetê kirin. Lê tevî ku biryara beraetê ya 20emîn Dadgeha Cezayê Giran hebû jî Dadgeha Îstînafê ji ber strana “Ronahî û Bêrîvan” û “Hatin” 10 cezayê hepsê û ji ber strana “Serhildan Jiyan e” jî 10 meh cezayê hepsê li Taşdogan birî.
Dadgehê xwest ku biryara hukmê paşê were eşkerekirin.
Parêzer Zafer Încîn destnîşan kir ku ew ê ji bo temyîzê biryarê veguhezînin Dadgeha Bilind.
‘Stranên Kurdî ceza kirin’
Zafer Încîn anî ziman ku ev dadgeh berê derheqê dozên girantir de jî biryarên xerab nedida û wiha got: “Li ser Kasim biryarek hat dayîn. Wisa xuya dike ku ji cihekî bilind biryar hat û xwestin Kasim ceza bikin. Vê dadgehê berê dozên ji ya Kasim girantir derbarê wan de biryara beraetê dida. Lê mixabin Kasim ceza kir. Her du stran jî ne yên Kasim in. Heta niha qedexe li ser van stranan tune ye. Kasim hunermendek gelek tê hezkirin û nasîn. Di şexsê Kasim de xwestin huner stranên Kurdî û guhdarên Kasim ceza bikin. Dadgehê di vê dozê de hinek niyeta xwe eşkere kir.”
‘Dixwazin muzîka Kurdî krîmînalîze bikin’
Kasim Taşdogan jî têkildarî cezayê li wî hatiye birîn axivî û destnîşan kir ku armanc cezakirina huner û stranên Kurdî ye û ev yek anîn ziman: “Me ji şirketa stranan jî belgeyên qaset û CDyên van her stranan xwest ku va stran jî ne qedexe ne. A rastî me hêvî nedikir ceza bê birîn. Her sê stran jî bi awayek fermî tên firotin. Mabesta wan ew e ku stran û muzîka Kurdî bidin rawestandin û krîmînalîze bikin. Dixwazin muzîka serhildêr û berxwedêr a Kurdî bêdeng bikin. Xwestin guhdar ji van stranan dûr bikevin û guhdar nekin. Pergal stgranên Kurdî ji bo xwe xetere dibîne. Ji bo min ev ceza bû sedem ku motîvasyona min baştir bibe û stran û berhemên baştir biafirînim. Li ber vî cezayî em matmayî neman. Çimkî halê wan ev e. Ev doz ji destpêkê heta dawî tiştek pêkenok e.”
