Dozger der barê Rojnameger Oznûr Deger a ku di 7ê Sibatê de li Mêrdînê bi lêdanê hat binçavkirin û dû re hat girtin de îdianame amade kir. Parvekirinên medyaya dijîtal, nûçeyên çêkirî û wêneyê birayê wê yê hat kuştin di îdianameyê de wek sûc hat bicihkirin.
Dozgerê Komarê yê Mêrdîne der barê Midûra JINNEWSê Oznur Deger a ku di 7ê Sibatê de li navçeya Qoserê ya Mêrdînê di serdegirtina mala wê de ji aliyê polîsan ve bi lêdanê hat binçavkirin, îdianame amade kir. Li gorî nuçeya JINNEWSê, Serdozgeriya Komarê ya Mêrdînê bi îdiaya “Propagandaya rêxistinê kiriye” îdîaname amade kir û 2yemîn Dadgeha Cezayê Giran a Mêrdînê ve îdîaname qebûl kir. Dozger der barê 21 parvekirinên cuda yên Oznur Deger ên di navbera salên 2021-2025’an de li ser hesabê xwe yê medyaya dîjîtal X (twitter) îdianame amade kir. Dozger hem bi nûçeyên çêkirine û parvekirinên medyaya dijîtal, hem jî ji ber wêneyê birayê Oznur Deger Abdulselam Deger (Kendal Qoser) ê ku di navbera salên 2015-2016’an de di dema qedexeyên derketina derve yên li Nisêbînê de jiyana xwe ji dest da û heta niha cenazeyê wî nehatiye teslîmkirin sûcdar kir. Oznur Deger jî bi parvekirina nûçeya Musur Aslan ê ku di dema qedexeya derketina derve ya li Nisêbînê de jiyana xwe ji dest da, hat sûcdarkirin. Di heman demê de nûçeyên derbarê hestiyên Bahar Goktekîn a li Nisêbînê di dema qedexeyên derketina derve de jiyana xwe ji dest da û piştî 7 salan radestî malbata wê hat kirin jî bû mijara sûc.
Dozger bertekên Oznûr Deger ên li hemberî gotinên zayendperest ên polîsan a di merasîma sersaxiyê ya ji bo rojnameger Nazîm Daşdan û Cîhan Bîlgîn ên hatin qetilkirin de li navçeya Mîdyatê hate lidarxistin jî weke hincet hat nîşan dan. Serlêdana sûc a Oznur Deger û lêpirsîna ku derbarê wê de hatî vekirin di îdianameyê de cih girt.
Dozger di îdianameyê de, îdia kir ku nivîsên Oznur Deger “sînorên azadiya ramanê derbas kirine” û wêne û dîmenên ku bi nûçeyê re hatine parvekirin wekî “hewldaneke ji bo meşrûkirina PKK’ê” şîrove kir. Serdozgeriyê diyar kir ku wezîfeyên Oznur Deger di dîrokên cuda de hatine dubarekirin, destnîşan kir ku divê li ser Oznur Deger jî qanûnên “sûcê domdar” bên bicihanîn.
Danişîna ewilê ya dozê dê di 22’yê Gulanê de bê dîtin.
