Amed – Dayikên Aştiyê Nezahat Teke û Hava Kiran têkildarî axaftina bi Kurdî ya Numan Kurtulmuş a li Amedê diyar kirin ku ew dixwazin ku Kurtulmuş demildest ji ber astengkirina zimanê wan a li Komîsyonê lêborînê bixwaze û beriya her tiştî astengiyên li pêşiya Kurdî bên rakirin.
Dayikên Aştiyê Nezahat Teke û Hava Kiran ku li Komîsyona Demokrasî, Xwişk-Biratî û Hevgirtina Millî axaftina wan a bi Kurdî hatibû astengkirin, têkildarî axaftina bi Kurdî a Serokê Meclîsê û Serokê KOmîsyonê Numan Kurtulmuş ku duh li Amedê risteyek bi Kurdî xwendibû û pesnê Kurdî dabû, axivîn.
Endamên Meclîsa Dayikên Aştiyê yên Amedê Nezahat Teke û Hava Kiran ên ku beşdarî Konferansa Dayikên Aştiyê ya 3yemîn bûn ji Ajansa Welat re axivîn û destnîşan kirin ku beriya her tiştî divê Numan Kurtulmuş li Amedê lêborînê ji Dayikên Aştiyê bixwesta.
‘Helbestan nexwîne, ewilî astengiyan rake’
Dayika Aştiyê Nezahat Teke diyar kir ku dema ew ji Amedê çûn Komîsyonê û heke Numan Kurtulmuş bihişta ew li Komîsyonê bi Kurdî biaxiviyan, wê wî li wir pîroz bikira û got: “Me yê bigota vaye dewlet gavekî diavêje.” Nezahat Teke bi bîr xist ku gelek serokwezîr, wezîr, serokkomar hatin Amedê û gotin ‘Rêya aştiyê di Amedê re derbas dibe, Kurd hene û Kurdî heye’ lê yek jî sozên xwe bicih neanîn û wiha got: “Ew (Numan Kurtulmuş) îro li Amedê helbestan jî bixwîne û bi Kurdî jî biaxive ji bo me pûç e. Çimkî wî zimanê dayikê li Meclîsê qut kir. Ziman zimanê dayikê ye. Hê jî bi zimanê şer diaxivin. Şîrê herî helal şîrê dayikên Kurdan e. Ji wan re şîrê dayika wan helal e, weka ku ji me re ne helal be. Bila biborînin bila beriya her tiştî ziman diyarî dayikan bikin. Li dijî zimanan nîn in, her ziman pîroz in. Lê cihê ku zimanê min lê hebe, hemû ziman pîroz in.”
‘Divê lêborînê bixwaze’
Nezahat Teke destnîşan kir ku divê Kurtulmuş lêborînê bixwaze û wiha axivî: “Divê Numan Kurtulmuş ewilî ji me lêborînê bixwaze. Pêvajoya ku zimanê min têde tune be, ne pêvajo ye. Eger zimanê min tine be, nasnameya min tine ye, eger zimanê min asteng bikin hebûna min nayê nasîn. Ez wan dawetî samîmiyetê dikim.”
‘Çima qey zimanê wan tenê helal e’
Dayika Aştiyê Hava Kiran destnîşan kir ku heke zimanê wan li wan wekî şîrê dayika wan helal be, lê nexwê zimanê Kurdî çima asteng e û ne helal e. Hava Kiran diyar kir ku mafê dayikan e ku bi zimanê xwe biaxivin û got: “Çimkî em bi lorîk, rabûn û rûniştinên dayikên xwe mezin bûn. Helbet em ê bi Kurdî biaxivin.”
‘Divê Numan Kurtulmuş lêborînê ji dayikan bixwaze’
Hava Kiran da zanîn ku Serokê Meclîsê û Komîsyonê Numan Kurtulmuş hem li Meclîsê zimanê wan asteng dike hem jî tê bajarê Amedê li ser zimanê Kurdî diaxive û got: “Dibêje ‘zimanê dayikê wek şîrê dayikê helal e’ lê ev gotin nakokî ye û nemerdî ye. Komîsyonê nehişt em çar gotinên bi Kurdî bikin. Ji bo çar peyvên min xal hatin danîn. Lê duh hatiye Amedê qala girîngiya ziman dike. Numan Kurtulmuş mecbûre ewilî wê nakokiyê ji serê xwe derxe û demildest lêborînê ji dayikan bixwaze. Ku bên li Amedê bi zimanekî din biaxivin û biçin li Enqereyê jî bi zimanekî din biaxivin, ev ne zimanê aştiyê. Ev zimanê nakokiyê ye.”
