Dayikên Şemiyê di hefteya Hezar û 58an de çalakiya ji bo windayan berdewam kirin. Dayikan xwest kujerê Vedat Aydin bên cezakirin û li gorî hiqûqê tev bigerin.
Dayikên Şemiyê her hefte ji bo aqûbeta xizmên xwe yên hatin windakirin, her hefte li Qada Galatasarayê kom dibin. Dayikên Şemiyê di hefteya hezar û 58emîn de dîsa kom bûn û li aqûbeta windayan pirsîn. Dayikên Şemiyê bi qurnefîlan û wêneyên xizmên xwe yên di binçavan de hatin windakirin li Qada Galatasarayê kom bûn. Dayikan vê hefteyê aqûbeta Serokê Partiya Kedê ya Gel (HEP) ê Amedê Vedat Aydin pirsîn. Li gel gelek aktivîstên mafên mirovan, Hevseroka Giştî ya ÎHD’ê Eren Keskîn jî beşdarî daxuyaniyê bû. Di daxuyaniyê de ji xizmên windayan Îkbal Eren axivî. Erenê behsa pêvajoya qetilkirina Vedat Aydin û pêvajoya darizandinê kir.
Îkbal Erenê destnîşan kir ku dewlet têkildarî windakirina Vedat Aydin de peywira xwe ya eşkerekirina heqîqetê û pêkanîna edaletê pêk neaniye û got: “Di dosyeya Vedat Aydin de dawî li înkarê û bêcezatiyê bînin. Demildest hiqûqê bixebitînin. Kiryar û berpirsiyarên tên zanîn bidarizînin û peywira xwe ya cezakirinê bi cih bînin.”
Vedat Aydin di 5ê Tîrmeha 1991an de li Amedê ji aliyê endamên JÎTEMê ve hat binçavkirin. Di 7ê Tirmehê de li pira Madenê cenazeyê wî hat dîtin. Di 10ê Tîrmehê de cenazeyê wî ji aliyê sed hezaran kesan ve bi girseyî hat definkirin.
