DBPê piştevaniya xwe ya ji bo hevdîtina di navbera alî û hêzên Kurd de li Hewlêrê pêk hat de eşkere kir û got ku ew hevdîtinê girîng û qedirbilind dibînin û banga pêkhatina Yekitiya Neteweyî ya Kurd kir.
Partiya Herêmên Demokratîk (DBP) têkildarî hevdîtina Fermandarê Giştî yê Hêzên Sûriyeya Demokratîk (HSD) Mazlûm Ebdî û Serokê Giştî PDKê Mesud Barzanî û şandeyê wan daxuyaniyek nivîskî belav kir.
Mazlûm Ebdî şandeya xwe û Mesûd Barzanî û şandeya xwe duh li Hewlêrê li hev civiyabûn û geşedanên li Başûr û Rojavayê Kurdistanê û Sûriyeyê nirxandibûn.
Daxuyaniya DBPê ya bi sernavê “Yekitiya Kurdan Temînata Pêşeroja Azad û Hevpar a Gelan e” bi vî rengî ye:
“Di şexsê Rojhilata Navîn de di vê sedsalê de di hevsengiya hêzên kurewî de guherînin dîrokî pêk tên. Di pêvajoyeke bi vî rengî de pêkhatina Yekitiya Neteweyî ya Kurd, di warê hebûn û têkoşîna mafên Kurdan de xwedî cihekî dîrokî ye. Gelê Kurd ê ku di her kêliyên dîrokî de rastî polîtîkayên înkarê hatine, îro di warê avakirina pêşeroj û parastina destkeftiyên xwe de derfetên dîrokî dijîn. Geşedanên ku îro li Rojhilata Navîn pêk tên, nîşan dide ku; divê gelê Kurd çima yekitiya xwe ava bike û hêzên xwe bi awayekî hevpar mezin bike.
Li ser esasên Yekitiya Neteweyî pêkhatina yekitiya Kurdan li hember gefên ku destkeftiyên neteweyî hedef digrin, pêdiviyeke dîrokî ye. Ji ber vê yekê, di navbera Kurdan de yekitî, di navbera hêz û siyaseta Kurdan de avakirina tifaqan û pêşxistina têkiliyan hem ji bo armancên hevpar û hem jî ji bo diyarkirina stratejiyeke neteweyî wê derî ji derfetan re veke.
Em hevdîtina li Başûr gelek qedirbilind dibînin
Di vê çarçoveyê de em wek Partiya Herêmên Demokratîk (DBP) hevdîtina ku duh li Başûrê Kurdistanê di navbera hêzên Kurd de pêk hat, gelek girîng û qedirbilind dibînin. Di vî warî de hêviya me ew e ku; li ser esasên Yekitiya Neteweyî hêzên Kurd di navbera xwe de pêwendiyên erênî ava bikin û van pêwendiyan bi pêş bixin.
Gelê Kurd sed sal in bê statu hatiye hiştin. Ji bo ev rewş xwe dubera neke û dîrok car din şahida têkçûyîna Kurdan neke, divê yekitiya gele Kurd, tifaq û hevkariya gelê Kurd bi her awayî li ser esasên nirxên netewî pêş bikevin. Ev yek wê hem ji bo gelê Kurd û hem jî ji bo gelên herêmê deriyên jiyaneke azad, demokratîk û aştiyeke bi rûmet veke.
Hêviya yekitî û aştiya navxweyî
Yekitiya ku wê di navbera gelê Kurd de pêk were, ne tenê di warê yekiniya hêzan de, wê di warê dîrok, çand û pêşerojeke hevpar de jî jiyaneke nû ava bike. Ji ber vê yekê jî avakirina Yekitiya Neteweyî ya Kurd li gel qada siyasî di warê çand û civakî de jî berpirsyariyeke dîrok ye. Parastina destkeftiyên gelê Kurd, ne bi perçebûn û têkçûyînê, wê bi yekitî û aştiya di navbera gelê Kurd de pêk bê.
Tifaqa di navbera hêzên Kurd de, wê hem ji bo îro û hem jî ji bo avakirina pêşeroja Kurdan bibe gaveke bingehîn. Bi vê mabestê ji bo li Kurdistan û Rojhilata Navîn jiyanake azad, wekhev û demokratîk ava bibe wek DBP em ê bi ruhê Yekitiya Neteweyî bangawazî û hewldanên xwe bidomînin.”
