Hevserokê Kongreya Gel Remzî Kartal têkildarî banga Rêberê Gelê Kurd Abdullah Ocalan nirxandin kir û got: “Bi vê dîmen û daxuyaniyê hat îspatkirin ku konsepta dewletê ya înkar û îmhayê bi ser neketiye û dewlet neçar maye ku xwe biguherîne.”
Rêberê Gelê Kurd Abdullah Ocalan piştî 26 salan cara ewil bi dîmen peyamek parve kir û bal kişand ser girîngiya aştiyê, siyaseta demokratîk û civaka demokratîk. Banga Abdullah Ocalan li cîhanê deng veda. Hevserokê Kongra Gel Remzi Kartal têkildarî banga Rêberê Gelê Kurd Abdullah Ocalan ji Ajansa Welat (AW) re axivî. Remzî Kartal anî ziman ku piştî 26 salan bi dîmen ditin û guhdarkirina Rêberê Gelê Kurd û hevalên li gel wî, ji bo gelê Kurd, Rojhilata Navîn rojeke dîrokî ye û wiha got: “Ev daxuyaniya bi dîmen yekser girêdayî pêvajoyê ye. Rêberê Apo jî di peyama xwe de li ser girîngiya pêvajoyê û hevî û baweriya xwe tîne ziman.”
Hevserokê Kongreya Gel Remzî Kartal, da zanîn ku Rêberê Gelê Kurd Abdullah Ocalan hevdîtinên li Îmraliyê yen li gel wî û avakirina maseyê wekî maseyeke dîrokî tîne ziman û dibêje ‘Maseya li Îmraliyê hatiye avakirin, ji pêvajoya îdamê em hatine vê maseyê. Ev danîna vê maseyeke demeke dîrokî ye.
Konsepta înkarê encam negirt
Remzî Kartal da zanîn ku konsepta dewletê ya li ser înkar û îmhayê hatiye avakirin, bi ser neket û bê encam ma û wiha pêde çû: “Niha ev pêşketinên dawî yên li hundir û derve yên 10 salên dawî dewlet anî vê astê. Gotinên Rêber Apo îspat kir. Rêber Apo her tim digot ‘Hûn bi siyaseta şer nikarin vê meseleyê çareser bikin. Hûn nikarin bi şer serhildana dawî ya PKKê têk bibin. Eger hûn di şer de israr bikin hûnê dawiya pergala xwe bînin.’ Niha pergal ketiye krîzeke kûr. Pergala dewletê ku hebûna gelê Kurd qebûl nake qeyraneke kûr dijî.”
Dîmenê Rêber Apo bû belge ku dê pêvajo bimeşe
Remzî Kartal bal kişand ser girîngiya dîmenê û wiha lê zêde kir: “Maseya Îmraliyê îspat dike ku dewlet li hemberî Rêber Apo hatiye vê nokteyê ku êdî dewlet wekî berê nikare xwe bi rêve bibe. Divê êdî dewlet xwe biguherîne. Rêber Apo jî di aliyê guheritnê de baweriya xwe tîne ziman. Maseya li Îmraliyê wekî merhaleyek dîrokî pînase dike. Ji bo me û ji bo hemû raya giştî ya Tirkiye û Rojhilata Navîn ew dîmenê Rêber Apo bû belgeya ku êdî ev pêvajo dê pêş bikeve û bê meşandin. Vî dîmenê hat parvekirin ji bo pêşxistina pêvajoyê hêvî zêdetir kir.”
Hevserokê Kongra Gel Remzî Kartal bal kişand ser peyama Rêberê Gelê Kurd ku bi dîmen parve kir û got: “Ev peyama bi dîmen a Rêber Apo hêviyê zêdetir dike. Naveroka peyamê yek bi yek vekirî ye. ev peyam yekser ji bo rêxistina tevgera azadiyê ye. Dibêje di 27ê Sibatê de me bang kir. We bersîv da û kongre pêk anî. Rêber Apo vê bersîva hatiye dayîn bersîveke cîddî û dîrokî dinirxîne. Pêwiste ku ev pêngava dîrokî gav bi gav ji bo çareseriyê pêş bikeve. Di aliyê zagonan de divê hikûmet û parlamento bersîvê bide û gavan bavêje.”
‘Divê gel xwe bi rêxistin bike û têbikoşe
Remzî Kartal anî ziman ku Rêberê Gelê Kurd Abdullah Ocalan fesixkirina partiyê wekî tiştekî neyini nabîne û wiha pêde çû: “Wekî tiştekî erênî dibîne. Ji bo demeke nû û çareseriyê gavek dîrokî dibîne. Ji ber vê yekê ev gav avêtina di vê pêvajoyê de dê bibe gaveke dîrokî. Dibêje ji bo ev pêvajo pêş bikeve divê di aliyê zagonî û yasayan de gav bêne avêtin. Rêber Apo vê pêvajoyê wekî pêvajoya têkoşînê tîne ziman. Divê gele me, dostên me û hemû raya giştî yên aştî û civaka demokratîk esas digirin divê hemû kes vê demê xwe bi rêxistin bike û bixebite.”
Rêber Apo ji bo gerdûnê aştî û çareseriyê dixwaze
Remzî Kartal bal kişand ser gotina Rêberê Gelê Kurd Abdullah Ocalan a ‘Siyaset valahiyê qebûl nake’ û got: “PKKê xwe fesix kir û gav avêt. Piştî wê divê di siyasetê de valahî nemîne. Divê gav bêne avêtin. Rêber Apo divê qada gel bê bi rêxistinkirin û siyaseta demokratîk bê xurtkirin. Divê pêwiste gel xwe bi rêxistin bike. Bi awayakî siyaseta demokartîk xwe bi rêxistin bike. Rêber Apo dibêje ev peyam tenê ji bo gelê kurd nîne. Çareserî tenê ji bo gelê Kurd nîne û Rojihalata Navîn nîne. Ji bo hemû gelê cîhanê ye. Ji bo gerdûnê peyamê dide. Ji bo her kesî aştî û demokrasiyê dixwaze. Rêber Apo tenê ji bo xwe azadiyê naxwaze. Dibêje azadiya min bi azadiya civakê ve girêdayî ye. Dibêje heta azadiya civakê pêk neyê, azadiya min jî pêk nayê. Azadiya min bi azadiya gel ve girêdayî ye. Divê gelê me yê azadîxwaz û aştîxwaz li ser vî esasî meseleyê bigirin dest. Azadiya Rêber azadiya civakê û azadiya gelan e. Ji bo gel azad bibe divê Rêber Apo azad bibe. Ji bo azadiya gel divê zagon bên guhertin. Divê gel xwe bi rêxistin bike û tev li pêvajoyê bike.”
Remzî Kartal, bal kişand ser rola meclisê û wiha bi dawî kir: “Piştî banga Rêber Apo dê di nava du rojên dawî de li Silêmaniyê merasimek taybet pêk bê. Ev jî bersîva banga Rêber Apo ye. Rêber Apo di aliyê xwe de gavên ciddî davêje. Tevger di aliyê xwe de gavên cîddî davêje. Pêwiste parlamento jî êdî demildest komîsyonê ava bike û dest bi xebatên hiqûqî bike. Divê di aliyê çareseriyê de gavên hiqûqî bavêje. Rêya çareseriyê çiye, dê mesele çapa bê çareserkirin divê ev komîsyon biçe bi Rêber Apo re rûnê û çüareser bike. Rêber Apo dibêje tevger min wekî sermuzakerevan pênase dike. Dewlet jî min wisa dibîne. Dibê komîsyon acil bê em li ser meseleyê niqaş bikin û çareseriyê pêş bixin. Divê meclis di aliyê qanûnan de li rêya çareseriyê bigere. Çavê her kesî êdî li parlamentoya Tirkiyeyê ye. divê di aliyê qanûnî û hiqûqî de gavan bavêje. Divê parlamento rola xwe bilîse û bibe bersîva raya giştî.”
