Zabitayên Şaredariya Konakê deriyê Komeleya Çand û Ziman a Awestayê mohr kirin. Hevserokê Komeleyê Ramazan Kaygisiz, anî ziman ku di vê pêvajoya ku aştî tê niqaşkirin de mohrkirina komeleya wan nayê qebûlkirin û got: “Mohrkirina komeleyê tê wateya mohrkirina devê kurdan.”
Zabitayên Şaredariya Konakê ya Îzmirê, îro deriyê Komeleya Awesta ya Ziman mohr kirin. Du roj beriya niha polîsên bi ser komeleyê de girtin bi hinceta ku rûxsata komeleyê tuneye gefên girtin û mohrkirinê xwarin. Duh jî zabita hatin komeleyê û anîn ziman ku dê îro mohr bikin. Di saetên sibehê de 2 zabitayên şaredariya Konakê hatin komeleyê û deriyê komeleyê mohr kirin.
Têkildarî mohrkirinê Hevserokê Komeleya Awesta ya Ziman Ramazan Kaygisiz, bertek nîşanî girtina komeleyê da û wiha got: “Di demeke weke îro ku pêvajoya aştiyê tê niqaşkirin, rayedaran hatin komele mohr kirin. Bi vê mohrkirinê, devê gelê Kurd û zimanê gelê Kurd mohr kirin. Bi salan e gelê Kurd ji bo ziman têdikoşe. Lê dewletê heta niha bersîveke erênî nedaye daxwazên gelê Kurd.”
Ramazan Kaygisiz da zanîn ku wekî Komeleya Awesta ya Ziman, gelek caran anî ziman ku divê zimanê Kurdî bibe zimanê perwerdehî û fermî û wiha axivî: “Em dixwazin Kurd jî wekî hemû gelên cîhanê bi zimanê xwe perwerdehiya xwe bibînin û bibin xwedî zimanê zikmakî. Divê hemû saziyên civakî û parazvanên mafên mirovan jî piştgiriyê bidin vê daxwaze me û li dijî vê yekê bertekên xwe bînin ziman.”
Rêveberên Komeleya Çand û Ziman ya Avestayê diyar kirin ku du roj beriya niha polîsên bi ser komeleyê de girtin bi hinceta ku rûxsata komeleyê tuneye gefên girtin û mohrkirinê xwarin.
