Berpirsên Dezgeha Şehîdên Iraqê diyar kirin ku li Iraqê bi giştî 221 gorên komî hene û ji van goran 134 gor hatine vekirin û hîna 87 gorên komî jî nehatine vekirin.
Li Iraq û Herêma Kurdistanê di dema rejîma Baas û êrişên çeteyên DAIŞê de bi deh hezaran welatiyên Iraqê û Herêma Kurdistanê hatine kuştin û di gorên komî de hatine veşartin. Berpirsên Dezgeha Şehîdên Iraqê di derbarê hejmara gorên komî yên li Iraqê de ji medya Iraqê re axivîn. Serokê Dezgeha Şehîdên Iraqê Ebdul Îlale Naîlî di daxuyaniyek ji bo medya Iraqê de diyarkir ku zêdetirî 220 gorên komî li Iraqê hene û gelek ji wan yên beriya sala 2003an a dema rejîma Baasê ne. Ebdul Îlale da zanîn ku yasaya damezrandina şehîdan û yasaya qurbaniyên terorê hinek mafên madî û exlaqî ji bo kesûkarên şehîdan digre nava xwe û ev jî bi muçeyê xanenişîniya kesûkarên şehîdan destpê dike ta şehîdên dema rejîma Baas û şehîdên terorê.
Rêveberê Giştî yê Gorên Komî li Dezgeha Şehîdên Iraqê Ziya Kerîm jî li ser hejmara gorên komî yên li Iraqê ji medya fermî ya Iraqê re got: “Li Iraqê du cûr gorên komî hene. Hin ji wan yên sucên rejîma Baasin. Yek ji cihên ku tê zanîn gorên komî lê hene çola Samawaye, di van gorên komî de hejmarek zêde mirov têde hatine veşartin. Piraniya wan jin û zarokin.”
Ziya Kerîm eşkere kir ku bi giştî 221 gorên komî yên beriya 2003 û piştî wê li Iraqê hene. Ji vana 91 yên dema rejîma Baas, 125 yên dema çeteyên DAIŞê ne. Gorên hatine vekirin 134 gorin û 87 gor jî nehatine vekirin.
Hêjayî bibîrxistinê ye piraniya qurbaniyên van komkujiyan ên dema rejîma Baas û çeteyên DAIŞ’ê welatiyên Kurdin.
