DFGê rojnameger Egîd Roj ê ku di êrişa SÎHAyê ya dewleta Tirk de hatibû kuştin, bi bîr anî û got ku ew ê xwedî li mîrasa Egîd Roj û rastiyê derkevin.
Komeleya Rojnamegeran a Dîcle Firatê (DFG) rojnameger Egîd Roj di salvegera yekemîn a şehadeta wî de bi bîr anî. Egîd Roj di 15ê Sibata 2025an de li Bendava Tişrînê ya li Rojavayê Kurdistanê di êrişa balafira bêmirov (SÎHA) a dewleta Tirk de hatibû kuştin.
Daxuyaniya DFGê a ji bo bîranîna Egîd Roj wiha ye:
“Tirkiyeyê bi SÎHAyê li ser Bendava Tişrînê ya li Bakur û Rojhilatê Sûriyê êriş kir û di wê êrişê de rojnameger Egîd Roj jiyana xwe ji dest da. Niha salvegera yekemîn a qetilkirina wî ye.
Egîd Roj bi gotinên xwe wek, ‘Ez tenê rojnamegerek nebûm, di heman demê de ez şahidê dîrokê bûm û heta demê dawî ya jiyana xwe jî dê wisa bimînim’ di bîra me de ma. Îro şagirt û şopdarên wî li pey şopa wî ne û li pey rastiyê ne.
Rojnamegerî ew e ku li dijî wan kesên ku dixwazin rastiyê tarî bikin, bibin dengê gel. Hate xwestin ku kameraya Egîd Roj were bêdengkirin; lê şahidî, nivîs û şopa ku wî li pey xwe hişt, îro bi hêztir dixebite û rastiyan radigihîne.
Her êrişek ku li dijî wan kesên ku li pey rastiyê ne tê kirin, ne ji bo tunekirina rastiyê ye, di heman demê de êriş li dijî rojnamegeriyê û heqîqetê ye. Em bejna xwe li ber bîranîna Egîd Roj ditewînin û em ê xwedî li mîrasa wî derkevin û mezintir bikin.
Em ê dest ji nivîsandina rastiyê, şahidiya bûyeran û parastina rastiyê tu carî bernedin.”
