Berdevkê Saziya Dadwerî ya Îranê Esxer Cehangîr diyarkir ku di encama êrîşa Îsraîlê ya li ser girtîgeha Evînê de, girtî jî di nav de 71 kesan jiyana xwe ji dest dane.
Balafirên şer ên Îsralê di şeva 24yê hezîranê de girtîgeha Evîn a li Tahranê jî bombebaran kiribûn.Berdevkê Saziya Dadwerî ya Îranê Esxer Cehangîr li ser girtîgeha Evînê de daxuyaniyek da.
Esxer Cehangîr got ku di encama êrişa Îsraîlê ya li ser girtîgeha Evîn ya li Tahranê de, 71 kesan jiyana xwe jidest dane û got; “Kesên jiyana xwe ji dest dane karmendên girtîgehê, ciwanên ku xizmeta leşkerî dikirin, hinek ji girtiyên di girtîgehê de, xizmên girtiyên ji bo serdanê hatibûn girtîgehê û hinek jî cîranên girtîgehê ne.”
Cehangîr got ku ji ber êrîşê ziyanek mezin gihiştiye avahiya girtîgehê, cihê hevdîtina malbat û girtiyan û avahiya dozgeriya giştî ya li girtîgehê.
Hêjayî gotinê ye girtîgeha Evîn dikeve taxa Evîn ya li herêma Şehran ya li paytexta Îran, Tahranê. Divê girtîgehê de Werîşe Mûradî û Pexşan Ezîzî jî di nav de gelek girtiyên din ên siyasî dihatin ragirtin.
