Dêrsim – Di Festîvala Çand û Xwezayê ya Mûnzûrê de li dijî madeneke ku tê xwestin li gundê Deştê yê girêdayî Dersimê were vekirin, meşek hate lidarxistin.
Di çarçoveya 23yemîn Mihrîcana Çand û Xwezayê ya Mûnzûrê ku bi dirûşma “Dêrsim jiyan e; dest nede xwezaya min, vîna min, zimanê min, baweriya min” tê lidarxistin de li dijî madeneke ku tê xwestin li gundê Deştê yê girêdayî Dersimê bê vekirin, meşek hate lidarxistin. Gel ji bo meşa ku di pêşengtiya Platforma Parastina Xwezaya Geyîksûyû û Gundên Derdora Wê de hate lidarxistin li têketina gund li hev civiya. Gundî heya qada gund meşiyan. Di meşê de pankarta bi nivîsa “Xwedî li xwezaya xwe derkeve û rê nede madenê”’ û dowîzên bi nivîsên “Dest nede pîroziyên min”, “Ji madena siyanûrê re na” û “Dest bi axa min, ava min û xwezaya min nede” hatin hilgirtin. Her wiha di meşê de dirûşmeyên weke “Em li Dersimê madenê naxwazin”, “Geyîksûyû li ber xwe dide”, “Dest bi xwezaya min û ava min nede” û “Em ê bi têkoşînê ser bikevin” hatin berzkirin.
‘Têkoşîna me ya mafdar û rewa dê berdewam bike’
Berdevkê Platporma Parastina Xwezaya Geyîksûyû û Gundên Derdora Wê Hidir Yildiz ev yek anîn ziman: “Weke hemû mijaran, nêrîn û hewarên me yên têkildarî qadên jiyana me jî ji bo wan ne girîng in. Li gelek deverên Dersimê bi hezaran hektar erd ji bo madenê hatine diyarkirin û ruxseta wan hatiye dayîn. Şîrketan li pêşiyê kemîn danîne. Li Dersimê kiryarên madenvaniyê ne nû ne. Dema ku ew xwezaya me talan dikin em ê destûrê nedin û li cihê xwe nesekinin. Ji ber ku haya me ji girîngiya mijarê heye ji bo têkoşînê me hevdîtinên hewce pêk anîne û biryar hatiye dayîn ku platform were vekirin. Em ê qadên jiyana xwe biparêzin. Têkoşîna me ya mafdar û rewa berdewam dike û wê berdewam bike jî.”
