23yemîn Mihrîcana Çandê ya Mûnzûrê bi panela ciwanan û meşa li dijî qeyiman dewam kir. Ciwanan li dijî xizanî, asîmîlasyon û polîtîkayên hişbirê banga têkoşîna yekbûyî kirin.
23’yemîn Mihrîcana Çandê ya Mûnzûrê ku li Dêrsîmê îsal bi şîara ‘’Dêrsîm jiyan e; dest nede xweza, îrade, ziman û baweriya min” tê lidarxistin, bi panela ku pêşeroja ciwanan û zemîna têkoşînê digire dest, dewam kir.
Li Kolana Hunerê panela bi sernavê “Ciwan pêşeroj, pirsgirêk û pêşniyarên xwe yên çareseriyê nîqaş dike” hat lidarxistin. Tevî gelek ciwan û gel, Parlamentera DEM Partî ya Dêrsîmê Ayten Kordu, nûnerên partiyên siyasî û sivîl tevlî panelê bûn.
Dogancan Saritaş û Ertan Çita moderatoriya panelê kirin. Ciwanên ku di panelê de mafê axaftinê girtin, bal kişandin ser bêkarî û bêewlehiya ku polîtîkayên dewletê yên aboriyê diafirîne.
Axaftvanan qala zextên ku li zanîngeh, kargeh û kolanan rû bi rû dîmînin kirin û destnîşankirin ku çareserî bi têkoşîna birêxistinkirî pêkan e.
Di panelê de yek ji mijarên ku pir hate ser ziman polîtîkayên hişbir û çetebûn bû. Beşdaran diyar kirin ku dewlet ji bo asîmîlekirin û bêrêxistinkirina ciwanan çete û hişbirê bi zanebûn bi kar tîne û destnîşankirin ku ev xeterî bi taybet li Stenbolê û erdnîgariya Kurdistanê zêde ye.
Ciwanan bang li malbatan jî kirin û wiha gotin: “Zarokên xwe ji têkoşîna şoreşgerî dûr nekin, radestî çeteyan nekin.”
Piştî panelê ji Kolana Hunerê heta Parka Mamekî li dijî desteserkirina îradeyê meş hat lidarxistin.
Hevşaredarên Dêrsîmê Bîrsen Orhan û Cevdet Konak ên erka wan hat desteserkirin, Parlementer Ayten Kordu, çalakvana TJAyê Ayla Akat Ata û gelek kes tevlî meşê bûn.
Girseyê pankarta “Em xwedî li ked, kar û pêşeroja xwe derdikevin” hilgirtin û di tevahiya meşê de dirûşmeyên “Qeyim ji Dêrsîmê bicehime”, “Jin, jiyan, azadî!” hatin berkzirin.
Karkerên şaredariyê diyar kirin ku ji aliyê qeyimê ve ji kar hatine derxistin. Karkeran anîn ziman ku ew rojên zehmet dijîn û xwestin dawî li pêkanînên qeyimê bên anîn.
Girse piştî meşê li Parka Mamekî li hev civiyan. Mihrîcan piştî van bernameyan bi konserê bi dawî bibe.
