Duh bi şev li navçeya Mehsertê qezaya trafîkê çêbû. Ferdên malbata Fîdan ku ji hevdîtina li girtîgehê vedigeriyan di qezayê de jiyana xwe ji dest dan.
Duh bi şev li devera gundê Kafsenorê ya navçeya Mehserta Mêrdînê wesayîta malbata Fîdan qezaya trafîkê kir. Ferdên malbata Fîdan ku çûbûn serdana Rûkiye Fîdan a ku li Girtîgeha Jinan a Bakirkoya Stenbolê tê ragirtin, dema vedigeriyan qeza kirin. Di qezayê de 4 kesan jiyana xwe ji dest da û gelek kes jî birîndar bûn. Dayika Rûkiye Fîdan, Sûna Fîdan (42), xwişk û birayên wê Gulbahar (18) û Ramazan (17) û mamê wê Mehmet Nûr Fîdan (51) e di qezayê de jiyana xwe ji dest da. Piştî lêkolîna cihê bûyerê, cenaze rakirin morga Nexweşxaneya Dewletê ya Mehsertê. Piştî karûbarên otopsiyê cenaze ji hêla xizmên wan ve hatin wergirtin û birin gund.
Gelek kes tev li merasîma cenazeyê bûn. Cenaze, piştî wecîbeyên olî li goristana gund hatin definkirin.
Hat zanîn ku şîna malbatê dê li gundê Qudê bê danîn.
