Endama Înîsiyatîfa Yekitiya Demokratîk Dîba Keskîn di panela “Di Îslamê de civak û jin” a YOAYDERê de bal kişand ser rola jinê û got “Heke em civaka xwe fêm nekin, em nikarin pêşde gavê biavêjin. Heke em jinan di hundirê malê de bigirin û nehêlin derkevin nav civakê, em nikarin pêş bikevin.”
Komeleya Lêkolîna Olê û Piştevaniyê ya Alimên Olê ya Geverê (YOAYDER), li navçeya Şemzînan a Colemêrgê bi sernavê “Di Îslamê de civak û ol” panelek li dar xist. Panel, li eywaneke dawetê ya li navçeyê hat lidarxistin û nûnerên partiyên siyasî, rêxistinên civaka sivîl û bi sedan welatî beşdar bûn. Di destpêkê de aktivîstê Kongreya Îslama Demokratîk (KÎD) Lokman Ozdemîr axivî û bal kişand ser rêxistinbûna zêde ya cîhadperestan a li Şemzînanê. Piştre jî Quran hate guhdarîkirin.
Piştre miftuyê berê Abdullah Sagir axivî û anî ziman ku tevgera azadiyê ya Kurd bû wesîle ku dengê jinan li her derê belav bibe û got: “Mixabin cihên jin xwe jê vedikişînin em zilam tije nakin. Cihê jin lê nebin, kêm dimîne. Heke jin tune be, civakek kor e. Hewceye jin di serdema pêş de di van qadan de cih bigirin û teşe bidin civakê.”
Bang li zilaman kir: Pêşiya jinan negirin
Endama Înîsiyatîfa Yekitiya Demokratîk Dîba Keskîn jî bal kişand ser wateya Quranê û got: “Gelê Kurd îro li Rojhilata Navîn ji bo mirovahiyê têdikoşe. Heke em civaka xwe fêm nekin, em nikarin pêşde gavê biavêjin. Heke em jinan di hundirê malê de bigirin, karên malê pê bidin kirin, xwarinê pê bidin çêkirin, nehêlin derkevin nav civakê, em nikarin pêş bikevin. Ên ewil bi Îslamiyetê bawerî anîn, jin in, şehîdên ewil ên di rêya olê de jin in. Jinan di her qada jiyanê de cih girtine. Em ê li pey ‘sedemên’ jinan di hundirê malê de digirin, jinan paşde dihêlin bikevin. Banga me ji bo hemû zilama ye. Pêşiya jinan negirin. Zilam, di tevahiya dîrokê de ji bo gelek qadên tê de cih girtine deyndarên jinan e.”
Panel, bi pirs û bersivan bi dawî bû.
