Amed – Newroza 2026an a Amedê, di bin baran û teyrokê de bi coşeke mezin hat pîrozkirin. Sed hezaran kesên ku qada Newrozê tije kirin, bi slogana “Kurdistan Yek e” peyama yekîtiya neteweyî dan cîhanê.
Li bajarê Amedê, pîrozbahiya Newrozê ya ku bi beşdariya sed hezaran kesan pêk hat, bû qada dîmenên dîrokî. Gelê Kurd ji her çar parçeyên Kurdistanê û bajarên herêmê berê xwe da qada pîrozbahiyê û her wekî her sal, Amedê vîna xwe ya siyasî û çandî nîşan da.
Sloganên yekîtiyê olan dan
Tevî ku baranek dijwar û car caran teyrok dibariya, girseya gel heta saetên dawî qadê neterikand. Di pîrozbahiyê de sloganên ku daxwaza yekîtiyê dikirin derketin pêş. Bi taybetî sloganên, “Yek e yek e yek e, Kurdistan yek e” ji qadê olan da.
Ev dirûşm di tevahiya pîrozbahiyê de ji aliyê sed hezaran kesan ve hate berzkirin ku ev wekî nîşaneya ruhê yekîtiya neteweyî hat nirxandin.
Di qadê de cil û bergên kurdewarî, poster û al, rengên kesk, sor û zer û coşa ciwan û jinan dîmenên pirr raxistin ber çavan. Di dîmenên ji qadê hatin girtin de hat dîtin ku vîna gelê Kurd li dijî hemû astengiyan û zilmê jî bi hêz e û bi ruhê yekîtiyê qada Newrozê hatiye tijekirin. Pîrozbahî piştî axaftinên siyasî û bernameyên hunerî, bi gerandina govendê ya di bin baranê de bi dawî bû.
