Amed – Dayikên beşdarî mitînga bi dirûşma “Jibo Aştiyê Azadiyê” ya Amedê bûn diyar kirin ku ji bo aştiyeke mayînde beşdarî mitîngê bûne û gotin: “Divê dewlet jî wek Rêberê PKKê Abdullah Ocalan zelal bibe û ji bo aştiyê gav biavêje.”
Şandeya ji parlamenterên DEM Partiyê Pervîn Buldan û Sirri Sureyya Onder pêk tê di 28ê Kanûna 2024an û 22yê Çile de li Girtîgeha Tîpa F ya Îmraliyê bi Rêberê PKKê Abdullah Ocalan re hevdîtin kirin. Piştî hevdîtinên li gel Abdullah Ocalan pêk hatin, bi pêşengiya DEM Partiyê û Partiya Herêmên Demokratîk (DBP) gelek bajarên bakurê Kurdistanê û Tirkiyeyê civînên gel bi dirûşma “Ji bo aştiyê azadî” hatin lidarxistin û hêj jî civînên gel berdewam dikin. DEM Partî û DBP di wan civînan de hem derheqê pêvajoyê de gel agahdar dike û di heman demê de seferberiya rêxistinkirinê daye destpêkirin. Her wiha bi pêşengiya her du partiyan li Stenbolê û Amedê mitîngên bi navê “Ji bo aştiyê azadî” hatin lidarxistin. Di 2ê sibatê de li Stenbolê û di 8ê sibatê jî li Amedê mîtîngên girseyî li dar xistin. Îro jî dê li bajarê Mêrsînê mitîng bê lidarxistin. Beşderwanên 8ê Sibatê de bi xeml û rengên xwe tev li mitînga Amedê bûn têkildarî pêvajoyê Ajansa Welat re axivîn.
‘Em êdî naxwazin mirov bên kuştin’
Dayika Aştiyê Maşallah Kaya destnîşan kir ku ev serdem bibe serdema aşitiyê û got: “Em êdî naxwazin xwîn birije û mirov bên kuştin. Bila destên xwe bidin destên kurdan û xwişk û biratiya xwe xurt bikin. Divê dewlet jî wek Rêberê PKKê Abdullah Ocalan zelal bibe û ji bo aştiyê gav biavêje. Bila partiyên siyasî jî çi dikeve ser milên wan bikin û êdî kezeba dayikan neşevite. Em êdî şer naxwaz in.”
‘Bila êdî dayîk negrîn’
Dayika Aştiyê Emîne Alkiş jî diyar kir ku ji bo aştî pêk bê ji Silopyayê beşdarê mitingê dibe û wiha got: “Em gelê kurd jî wek hemû gelan aştiyê dixwazin. Em çiqasî ji bo aştiyê destên xwe dirêj dikin lê dewlet hêj jî êrişê kurdan dike. Divê her çar aliyê Kurdistanê destên xwe bidin hevdû û bibin yek. Bila êdî dayîk negirîn. Bila hemû dayik destên xwe bidin destên dayikên kurdan û ji bo aştiyê bibin yek deng. Êdî ji kuştinê re bes e. Divê dewlet guh bide peyamên Rêberê PKKê Abdullah Ocalan û ji bo aştiyê gava yekemin tecrîdê rake”
‘Em dixwazin êdî Reberê Apo azad bibe’
Yek ji dayikên beşdarî mîtînge bûn Sakîne Behçet jî da zanîn ku êdî roj roja aştî û azadiyêye û got: “Êdî bes e ji vê zilm û zordariya ku gelê kurd dibine. Em dixwazin êdî Reberê Apo azad bibe û were nav gelê xwe. Çiqasî êriş bikin jî gelê kurd xelas nabe. Dewlet ji aliyekî dibêje aştî lê aliyîk jî sivîl û rojnamegera dikuje. Em aştiyê û wekheviyê dixwazin.”
‘Bila ev sedsala bibe dawiya şer’
Dayika Fehîma Aslan ku beşdarî mîtînge bû jî anî ziman ku ji bo aştî pêk bê beşdarî mitîngê bûye û wiha axivî: “Bila ev sedsala bibe dawiya şer. Em jin aştiyê dixwazin. Em êdî naxwazin zarokên me bên kuştin. Ev sedsale gelê kurd ji bo aştiyeke mayînde berxwe dide. Em bawer dikin ku ev sedsal dê bibe sedsala aştî û azadiyê. Em êdî bi xwe bawer in teqez serkeftin a me ye.”
