Amed – Şêniyên Amedê têkildarî xwefesixkirina PKKê û negavavêtina dewletê diyar kirin ku PKKê û Rêberê Gelê Kurd Abdullah Ocalan gav avêt divê êdî dewlet gavan biavêje.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir. Piştî bangê Partiya Karkerên Kurdistanê (PKK) 12ê Gulanê encamnameya kongereya xwe eşkere kir û ragihand ku xwe fesix kiriye. Piştî gavavêtina PKKê, gelê Kurd jî dixwaze dewlet gavan biavêjê. Welatiyên Amedê têkildarî pêvajoyê ji ajansa me re axivîn.
‘Div birêz Abdullah Ocalan û tevahî girtî bên berdan’
Welatiya bi navê Senîha Çîftçî diyar kir ku ew aştiyêk bi rûmet dixwazin û wiha axivî: “Gelê Kurd aştiyê dixwaze, aştiyekî tevahî pêk were dê girtîgeh vala bibin. Birayê min î ev 27 sal in di girtîgehê de ye. Divê di serî de birêz Abdullah Ocalan azad bibe û paşê tevahî girtîgeh vala bibin. Ez naxwazim dayîkên gerîla û leşkeran êdî negirîn. Çawa ku di cîhanê de mafên gelên din hene, divê mafê gelê Kurd jî hebin. Em jî dixwazin wekî gelên din bijîn.”
‘Bila Serokê me were berdan’
Welatiyê bi navê Mehmet Gultekîn jî destnîşan kir ku ew naxwazin ne dayîkên gerîla ne jî dayîkên leşkeran bigirîn û wiha got: “Em dibêjin êdî bes e. Bila aştî pêk were, aştî pêk were dê tevahî gel jî di nav aramiyê de bijîn. Heta kengê dê kuştin çêbibe. Divê girtiyên me bên berdan, bila Serokê me were berdan. Heke werin berdan em ê bizanibin ku dê aştî pêk were. Heke şer berdewam bike, ev pêvajo pûç dimîne. Em naxwazin ciwanên me êdî werin kuştin. Aliyek dibêjin aştî li aliyekî din jî dibêjin em ê lêxin, em we qebûl nakin. Kurd îro ji sedî sed aştiyê dixwazin. PKKê xwe fesix kir êdî divê gav bên avêtin. Bi kuştinê ev pirsgirêk çareser nabe.”
‘Bila zimanê Kurdî bibe zimanê fermî’
Welatiyê bi navê Mustafa Yalçin jî bi bîrxist ku di şer de gelê Kurd gelek bedelên mezin dan û got: “Dema ku aramî hebe gel jî di nav xweşiyê de dijî. Destihilatî divê gavan biavêje ji ber ku gel aştiyê dixwaze. Divê girtî bên berdan welê em ê bibêjin dê aştî pêk hatiye. Zimanê me êdî winda dibe, zarokên me êdî bi Kurdî naaxivin. Zimanê Kurdî bila bibe zimanê fermî, ev bibe wê zimanê me jî li pêş bikeve.”
‘Dora gavêvetinê ya dewletê ye’
Welatiyê bi navê Medenî Akyildiz jî da zanîn ku kesên ku aştiyê naxwazin ew ji şer hez dikin û wiha got: “Em naxwazin ne gelê me ne jî kesek din êdî bê kuştin. Bes e êdî ewqas xwîn hat rijandin. Ev 40 sal e şer heye êdî bes e. Gav bi hevparî tên avêtin. Yek alî gav nayê avêtin. Gav avêtin divê di navbera her du aliyan de pêk were. Çawa ku di dîrokê de gelê Kurd û Tirk bi hev re dijîn, divê îro jî aştî li ser wan bingehan were avakirin. Divê girtî bên berdan, ewqas kes hene ku bêsûc tên girtin. Divê mafê zimanê me werê dayîn. Vî zimanî kes ne daye me, zimanê me ne tiştekî firotinê ye. Kî înkarê ziman bike înkarê hebûna xwe jî dike.”
