Amed – Hevberdevkê Platforma Ked û Demokrasiyê ya Amedê Mehmet Oktay têkildarî xwefesixkirina PKKê diyar kir ku ji bo pêvajo pêş bikeve û bê fêmkirin divê saziyên civakî xebatên xwe zêde bikin.
Rêberê Gelê Kurd Abdullah Ocalan di 27ê Sibatê de banga “Aştî û Civaka Demokratîk” kir. Xwest PKK kongreya xwe pêk bîne û xwe fesix bike. PKKê li ser vê bangê di 1ê Adarê agirbest ragihan. Di 5-7ê Gulanê de 12mîn kongreya xwe pêk anî û di 12ê Gulanê encamnameya kongreyê eşkere kir. Piştî daxuyaniya PKKê gelek sazî û dezgehên cuda û gelek kesan piştgiriyê didin pêvajoyê. Hevberdevkê Platforma Ked û Demokrasiyê ya Amedê têkildarî xwefesixkirina PKKê û di pêşxistina pêvajoyê de peywîrê li ser milê saziyên civakî ji Ajansa Welat (AW) re axivî.
‘Biryara PKKê gelek giring e’
Mehmet Oktay diyar kir ku ew vê pêvajoyê pîroz dibînin û wiha axivî: “Birêz Abdullaha Ocalan di 27ê Sibatê de bang kir. Diyar kir ku êdî wextê çêkan bi dawî bûye û pêvajoyek da destpêkirin. PKKê jî piştgirî da banga birêz Abdullah Ocalan û di 1ê Adarê de agirbest îlan kir. Di navbera 5 û 7ê Gulanê jî kongreya xwe pêk anî û xwe fesix kir. Biryara PKKê gelek giring e. Em wekî saziyên civakî vê biryarê gelek pîroz dibînin. Divê qada siyasî û civakî vê pêvajoyê pêş bixe. Ji bo wê divê civak û qada siyasî xwe bi rêxistin bikê û bibe bersîva pêvajoyê. PKK gav avêt û berpirsiyariya xwe pêk anî. Divê êdî dewleta Tirkiyeyê jî gavan biavêje. Ji bo dewlet gavan biavêje divê sazî jî bixebitin. Ji bo civak rol û misyona xwe pêk bîne divê saziyên sivîl xebatên xwe xurt bike.”
Divê mercen Birêz Abdullah Ocalan rast bikin
Mehmet Oktay destnîşan kir ku dewlet bi çekan nikarê pirsgirêka Kurd çareser bike û wiha berdewam kir: “Divê dewlet banga birêz Abdullah Ocalan baş fêm bike û gavên şênber biavêje. Di girtîgehan de gelek girtiyên nexweş hene. Divê demildest girtiyên nexweş bên berdan. Ji bo pêvoja pêş bikeve divê şert û mercen Birêz Abdulllah Ocalan bên baş kirin. Divê daxwaza gel a perwerdehiya ziman û statuya ziman bibersivîne. Divê zimanê Kurdî bibe zimanê fermî û li her derê serbest bê axaftin.”
‘Kar dikeve ser milê saziyên civakî’
Mehmet Oktay herî dawî xwest her sazî di qada xwe de xebatê bike û got: “Divê her sazî xwe bi rêxistin bike. Çiqas rêxistina saziyan xurt bibe saziyek ewqas pêş dikeve û bandorê dide dora xwe. Ji xwe Birêz Abdullah Ocalan di daxuyaniya xwe de giringtiya rêxistinê diyar kiribû. Divê sazî jî rol û mîsyona xwe bibînin û baş bixebitin. Rol mîsyona pêvajoyê li ser mile saziyên civakî û siyasetê ye. Dewlet piştî banga 27ê sibatê tu gav neavêtiye. Ji bo dewlet gav biavêjê gelek kar dikeve ser milê saziyên civakî. Em dixwazin ku saziyên civakî bi xebatên xwe gel pêş bixe. Ku saziyen civakî rol û mîsyona xwe bilîzin dê dewlet gav biavêje. Lê ku nelîzin dê dewlet gavan neavêje. Divê hem saziyên li Kurdistanê û hem jî yên li Tirkiyeyê bixebitin û bi gelên Tirkiyê pêvajoyê bidin fêmkirin.”
