Amed – Hevşaredarê Bajarê Mezin ê Amedê Dogan Hatun bal kişand ser xebatên ziman, çand û hunerê û got ku wan piştî wêrankirina qeyûman ji nû ve bingeha van xebatan saz kiriye û dixwazin reng û rûyê bajêr bikin bi Kurdî.
Heşaredarê Bajarê Mezin ê Amedê Dogan Hatun ji Ajansa Welat re axivî û bal kişand ser xebatên ziman, çand û hunerê ku piştî qeyûman dane destpêkirin. Dogan Hatun destnîşan kir ku ew dixwazin mêjiyê qeyûm saz kiriye paqij bikin û ji nû ve reng û rûyê bajêr veguherînin Kurdewariyê.
‘Em ê rengê bajêr biguherînin’
Dogan Hatun bi bîr xist ku rêveberiyên xwecihî ji sala 1999an heta sala 2016an di destê partiyên wan de bûn û wiha got: “Me li ser ziman, çand û hunera xwe û têkiliyên bi gel re xebatên hêja kirin. Lê mixabin dema qeyûm hat di nava 8 salan de hemû xebatên me sekinand û mîna ku Kurd li vir najîn, cihêkariyê kir. Li ser navê çand û zimanê Kurdî tu xebatek nehişt. Hemû asteng kir. Lê dema me xebata hilbijartinê didomand, me soz da gelê xwe û me got em ê reng û ruyê bajarê xwe dîsa ji nû ve biguherînin. Me got çi xebatên li ser ziman, çand û hunerê hebin em ê ji nû ve saz bikin. Tu emareyek li ser navê gel nemabû. Qeyûm û rêvebirên wî tiştek di şaredariyê de nehiştibûn. Me ji nû ve xebatan da destpêkirin. Bingeha me hebû, lê me ji nû ve sazkirinê pêk anî.”
‘Ev xebat tenê têr nake’
Dogan Hatun diyar kir ku wan hemû xebatên xwe di bin navê Daîreya Çandê de ji nû ve saz kirin û hê dikin û got: “Me xebatên ziman, wêje, sînem, muzîkê ji nû ve dan destpêkirin. Gelo ev têr dike? Helbet hê jî têr nake. Piştî em hatin ser rêveberiyê, me dît ku gelê me di warê çand û hunerê de gelek tiştan dixwaze û çavê wan li gelek tiştan e. Em jî dixwazin gelê xwe di vî warî de têr bikin.”
‘Dixwazin nasnameya bajêr biguherînin’
Dogan Hatun anî ziman ku wan di xebatên li qadê de dîtine ku hewcedarî bi xebatên civakî û çandî heye û axaftina xwe wiha domand: “Me xwest em bi van xebatan rê li ber ciwanên ku madeyên hişbirê bikar tînin bigirin. Em dixwazin bi pirtûkxaneyan, xebatên çand û hunerê berê ciwanên xwe bidin van xebatan. Çi kar û barên qirêj hebe, sîstema heyî ji navçeya Rezanê dest pê kiriye. Pergal dixwaze navçeya Rezanê wek civakek bênasname bihêle. Lê belê na navçeya me ya Rezanê bi çand e, bi ziman e û nasname ye. Lê hewce ye xwedîderketin hebe, heke ev nebe em nikarin pêşî lê bigirin.”
‘Dê xebatên me bidomin’
Dogan Hatun da zanîn ku tenê avahî vebibe û tiştek lê neyê kirin, xebat vî awayî nameşe û got: “Em dixwazin li saziyan bingehê bidin sazkirin. Ez nabêjim me ji sedî sed her tiştî pêk aniye. Lê bi qasî ji destê me tê em dikin. Me du zarokistanan saz kir. Em bi hêvî ne ku di salên pêşiya me de hin bêtir zarokistanan vebikin. Her çiqas astengî li pêşiya me hebin, em ê hewl bidin ji pêşiya xwe rakin.”
‘Hûn jî werin kevirekî deynin ser kevir’
Dogan Hatun destnîşan kir ku her ziman ji bo wan girîng in lê helbet ji bo wan di serî de zimanê Kurdî tê û di dawiyê de wiha got: “Em bang li her kesî dikin ku piştgiriyê bidin van xebatên me yên ziman û çandê. Deriyê me ji hemû ciwan û xelkê me re vekirî ye. Hûn jî werin kevirekî bidin ser kevir. Werin em xebatên xwe bi hev re bimeşînin.”
