Serokê DTSOyê Mehmet Kaya da zanîn ku wan agahî wergirtine ku Deriyê Sînor ê Nisêbînê dê ji 31ê Adarê ve jinûve bê vekirin.
Civîna Meclîsa Odeya Bazirganî û Pîşesaziyê ya Amedê (DTSO) ya meha Sibatê bi beşdariya serok û endamên Komîteyên Pîşeyî li eywana civînê ya odeyê pêk hat. Seroka Meclisê Nevîn Îl civîn bi rê ve bir. Serokê Lijneya Rêveberiya DTSOyê Mehmet Kaya yê di civînê de axivî, anî ziman ku divê bajarên herêmê weke Herêma Pîşesaziyê ya Mega bê îlankirin.
Mehmet Kaya bal kişand ser dorpêça li Kobanê berdewam dike û wiha got: “Weke hûn dizanin me bi navê Platforma Piştevaniyê û Parastina Bajêr xebatek da destpêkirin. Bi taybetî bi pêşengtiya serokatiya odeya me û piştgiriyeke mezin a endamên meclisê û endamên komîteya pîşeyî, alîkariyên pir girîng hatin komkirin. Helbet armanca me ya sereke ew bû ku em vê alîkariyê di zûtirîn demê de bigihînin Kobanê ya ku di bin dorpêçê de ye. Armanca me ya ewil ew bû ku em alîkariyê di zûtirîn demê de ji Deriyê Murşîtpinarê bigihînin Kobanê. Lê daxwaza me bi rayedarên AFADê û ligel du nûnerên me ji deriyekî din re gihişt Kobanê. Alîkariya mirovî gihişt Kobanê. Ya ji bo me girîng ew bû. Cara ewil bi rêya organîzasyoneke sivîl alîkarî gihişt herêma di bin dorpêçê de. Niha em ji bo kampanyayeke duyemîn her tim daxuyaniyan û agahiyan belav dikin. Alîkarî tên komkirin û hevdîtinên me berdewam dikin. Em ê malzemeyên alîkariya mirovî yên bi heman rêbazê hatine komkirin li gel du hevalên me an ji Deriyê Sînor ê Murşîtpinarê an jî ji Deriyê Sînor ê Nisêbînê re bigihînin Kobanê.”
Mehmet Kaya diyar kir ku wan agahî wergirtine ku Deriyê Sînor ê Nisêbînê ku demeke dirêj e girtî ye dê ji 31ê Adarê ve ji nû ve were vekirin û destnîşan kir ku bi vekirina Deriyê Sînor ê Nisêbînê re wê her du alîkarî jî bi hêsanî werin şandin û bazirganiya bi Sûriyeyê re wê ji nû ve dest pê bike.
Du bajar dê ji pîşesaziya Farqînê sûdê bigirin
Mehmet Kaya bi lêv kir ku ji bo avakirina Herêma Pîşesaziyê ya Organîze Îhtîsas Pîşesaziya Xwarin û Çandiniyê ji Emlaka Mîlî veguhestina tapoyê hatiye kirin û anî ziman ku dê Herêma Pîşesaziyê ya Organîzeyê bibe heremeke ku Amed û Êlih jê sûdê werbigirin.
