Endamên Lijneya Kordînasyona Bajêr a Amedê ya TMMOBê yên jin li Amedê daxuyanî dan. Jinan diyar kirin ku li gel têkoşîna jiyana azadîxwaz û demokratîk a jinên Rojava ne û gotin: “Em bi hêza xwe ya rêxistinkirî piştgirî didin kampanyaya ku berdewam dike û bang li raya giştî dikin ku vê piştevaniyê mezin bikin.”
Lijneya Koordînasyona Bajêr a Amedê ya Yekîtiya Odeyên Avahîsaz û Endezyaran a Tirk (TMMOB) bi dirûşma “Piştgiriya Bi Jinên Kobanê re. Bi ruhê berxwedanê yê 8ê Adarê em jiyanê diparêzin” li avahiyê Şaxa Endezyarên Înşaatê ya li navçeya Yenîşehîrê ya Amedê daxuyanî da çapemeniyê. Endam û rêveberên TMMOBê û gelek kes tev li daxuyaniya çapemeniyê bûn. Metna daxuyaniyê ya bi Tirkî Hevseroka Odeya Endezyarên Madenê Zeynep Ogûzê xwend.
‘Berxwedana jinan a ku li Rojava bûye sembola hêviyê’
Zeynep Ogûzê diyar kir ku bi ruhê berxwedanê yê 8ê Adarê Roja Jinan a Cîhanê re piştgiriya xwe ya ji bo kampanyaya piştevaniya bi jinên Kobanê ji raya giştî re radigihînin û got: “Li hemberî polîtîkayên şer ên ku li cîhanê û Rojhilata Navîn her ku diçe zêde dibin, li dijî newekhevî û pêkanînên antî-demokratîk, em piştevaniya jinan û daxwaza aştiyê bilind dikin. Li Rojava, jin ne tenê mexdûrên şer in; di heman demê de ew kirde ne ku jiyanê ji nû ve ava dikin, bi xwerêxistinkirina xwe veguherîna civakî pêk tînin û li dijî pergala mêrsalar modeleke jiyana alternatîf ava dikin. Berxwedana jinan a ku li Rojava derketiye holê; bûye sembola hêviyê ya li dijî taritiyê, sembola avakirina nû ya li dijî rûxanê û sembola têkoşîna azadiyê ya li dijî tundiyê.”
‘Şer, mafên jinan ên hatine bidestxistin paş ve dibe’
Zeynep Ogûzê destnîşan kir ku polîtîkayên şer herî zêde bandorê li jin û zarokan dikin û wiha bi lêv kir: “Encamên giran ên wekî koçberkirin, xizanî, tundî, îstîsmar û bêparbûna ji mafê perwerdehiyê, perspektîfa zayendiya civakî ya şer bi eşkereyî nîşan didin. Şer dema ku jiyan, xweza û kedê wêran dike, mafên jinan ên hatine bidestxistin jî paş ve dibe. Ji ber vê yekê, em parastina aştiyê ya li dijî her cûre polîtîkayên mîlîtarîst wekî beşeke bingehîn a têkoşîna jinan dibînin. Di bin van mercan de xebatên piştevaniyê ne tenê alîkariyeke mirovî ne; di heman demê de helwesteke polîtîk e ku ji bo têkoşîna azadiya jinan tê nîşandan.”‘Di pêvajoyên aştiyê de gotina herî bi bandor gotina jinan e’
Zeynep Ogûzê di dawiya axaftina xwe de anî ziman ku pirsgirêka Kurd a ku li Tirkiyeyê bi salan e bêçareserî hatî hiştin, mijareke sereke ya civakî ye ku divê bi rêbazên demokratîk û aştiyane were destgirtin û got: “Êdî pêdivî bi pêvajoyeke wisa heye ku ne çek lê gotin tê de biaxivin; ne polîtîkayên înkar û ewlehiyê, lê gavên demokratîk werin avêtin. Rêya aştiyeke mayînde; ji lihevkirineke civakî ya ku li ser bingeha hemwelatiya wekhev, garantîkirina maf û azadiyên bingehîn û vekirina qenalên beşdariya demokratîk hatî avakirin, derbas dibe. Wekî jin em dizanin ku di pêvajoyên aştiyê de gotina herî bi bandor û mayînde, gotina jinan e. Em wekî jinên endezyar, mîmar û plansazên bajêr, li mîrasa dîrokî ya 8ê Adarê xwedî derdikevin û diyar dikin ku em li gel têkoşîna jiyana wekhevxwaz, azadîxwaz û demokratîk a jinên Rojava ne. Em bi hêza xwe ya rêxistinkirî piştgirî didin kampanyaya ku berdewam dike û bang li raya giştî dikin ku vê piştevaniyê mezin bikin.”
