26 kesên ku di 21ê çile de ji bo 26 rojan û 26 bajaran dest pê kiribûn, meşa xwe di roja 19an de didomînin. Hevskeroka KCDK-E Zubeyde Zumrut, li ser armanca meş û mîtînga 15ê Sibatê ku li Strasburgê pêk bê got; “Hîn şert û mercen Rêber Apo pêk nehatine. Em ê bi hevre îsal bikin sala azadiya Rêber Apo.”
Gelê kurd 26 salin 15ê Sibatê wekî roja reş û komploya navneteweyî şermezar dike. Gelê kurd 26 sal in li dijî komployê li kolanan çalakiyan li dar dixin. Gelê kurd bi têkoşîna xwe ya li kolanan komploya navneteweyî pûç kir. Li aliyê din ji bo azadiya fizîkî ya Rêberê PKKê Abdullah Ocalan li kolanan çalakiyên cur be cur li dar dixin û dimeşin. Rêberê PKKê Abdullah Ocalan 26 salin li Girava Îmraliyê di hucreyekê de tê tecrîdkirin. Li gel vê tecrîda giran, di hucreyê de 26 salin bi awayekî bêhempa têkoşînek dîrokî dide. Komploya navneteweyî bi têkoşîna gelê kurd û Abdulllah Ocalan li Îmraliyê hat pûçkirin. Abdullah Ocalan 26 sal in li ber xwe dide.
Ji bo azadiya Rêberê PKKê Abdullah Ocalan dostên kurdan di 10ê Cotmeha 2023an de pêngava “Ji Abdullah Ocalan re azadî, ji pirsgirêka kurd re çareseriya siyasî” dabûn destpêkirin. Pêngava ji bo azadiya fizîkî ya Rêberê PKKê Abdullah Ocalan 2 sal in bi çalakiyên cuda berdewam dike. Kurd û dostên kurdan li welatên cuda yên Ewropayê mîna Elmanya, Fransa, Swîsre, Hollanda û Belçîkayê ciwanên Kurd û enternasyonalîst wê bi daxwaza ‘Azadî ji Rêber Apo re’ berê xwe bidin Stasbûrê û beşdarî mîtîngê bibin.
Îsal jî di çarçoveya pêngavê de 26 nûnerên kurdan di 21ê çile de li Fransayê dest bi meşa 26 rojan û 26 bajaran kirin. Li aliyê din ciwan kurd û enternasyonalîst jî dê ji bo meşê di 9’ê Sibatê de li bajarê Heilbronn ê Elmanyayê li hev kom bibin û meşa dirêj wê di 15’ê Sibatê de li bajarê Strasbourg ê Fransayê bi meşeke girseyî bi dawî bibe.
Hevskeroka KCDK-E Zubeyde Zumrut, li ser armanca meş û mîtînga 15ê Sibatê ku li Strasburgê pêk bê ji Rojnameya Xwebûnê re axivî.
‘Em xwediyê paradîgmayê ne’
Zubeyde Zumrut, anî ziman ku ew ji bo azadiya Rêberê PKKê Abdullah Ocalan di 10ê cotmeha 2023an de pêngava azadiyê dabû destpêkirin û got: “Hamleya ‘Ji Rêber Apo re azadî, ji pirsgirêka kurd re statu’ ket sala duyemîn. Me diyar kiribû ku heta Rêber Apo azad bibe em ê têkoşîna xwe berdewam bikin. Di vê çarçoveyê de gelek planên girîng hatin kirin. Gelek çalakî hatin lidarxistin. Bi dostan re gelek çalakiyên bi heybet hatin lidarxistin. Em li her derê dibêjin, ev hamle bi pêşengiya dostên kurdan pêk hat. Dostên kurdan, bi kurdan re ji bo azadiya Rêber Apo têdikoşin. Niha ji mere dibêjin ‘Êdî nebêjin dost. Em jî xwediyê vê paradîgmayê ne.’ Dibêjin xwediyê vê paradîgmayê jî pêwist e azad bibe.”
‘Divê em betir dengê xwe bilind bikin’
Zubeyde Zumrut, da zanîn ku niha li pêşiya wan 15ê Sibatê heye û wiha axivî: “Me plansaziya meşa dirêj kiribû. Vê meşa dirêj di 21ê çile de li Parîsê dest pê kir. Ev meş li gorî 26 roj, 26 kes û li 26 bajaran hatiye plankirin. Sala par jî meşek wisa li Parîsê dest pê kir. Bi 25 kesan û 25 rojan dest pêkir. Ev meş ji bo azadiya Rêber Apo tê lidarxistin. Ev meş ne tenê meseleya meşa 26 kesan e. Ji bo mafê heviyê bê dayîn Dadgeha Mafên Mirovan a Ewropa (DMME) li gorî zagonên xwe biryar dabû. Ji bo ev biryar pêk bê, divê em li Ewropayê bêtir dengê xwe bilind bikin. Divê em li dijî kesên ku li Girava Îmraliyê tecrîdê kûr dike bêtir dengê xwe bilind bikin. Muxatabê kesên tecrîdê kurd dikin li Ewropayê ne. Ji ber vê yekê divê em li Ewropayê bêtir dengê xwe bilind bikin. Ev meş li ser esasê pêşxistina dîplomasiyê û brokrasiyê hatiye lidarxistin.”
Zubeyde Zumrut, bal kişand ser meşê û wiha berdewam kir: “Piyekî vê meşê milê civakê ye. Bi gelê kurd û gelên din re civîn û hevadîtin têne kirin. Di van hevdîtinan de hem pêvajoya komployê tê niqaşkirin, hem jî pêvajoya em têre derbas dibin bi gel re tê parvekirin. Mêvan jî tev li van civînan û hevdîtinan dibin. Ez jî çend caran tev li van civînan bûm. Meşvan di meşê de li bajar û bajarokan re welatiyan re, bi çapemeniyê re û bi saziyên civakî û demokratîk re, li dêran bi oldaran re û bi kesên cûr be cûr re hevdîtinan dike. Di van hevdîtinan de nêzîkatiyek germ û baş heye. Me bi gelek parlamenterên Ewropayê re jî hevdîtin kirin. Pirsgirêka kurd ji nêzîk ve dişopînin. Vê rewşa em têde li ser du esasa bala gelê Ewropa û siyasetmedtarên ewropa dikişîne. Yek jê çima Tirkiye di tecrîdê de israr dike û mafê heviyê naparêze. Mijara din jî statuya Rojava di rojeva civaka Ewropayê de ye. Rojava ji bo gelê Ewropayê û hem jî ji bo saziyên sivîl, şaredariyan û parlamenteran muhîm e. Rewşa Rojava di rojeva wan de ye.”
‘Divê Fransa ji bo azadiyê rola xwe bilîze’
Zubeyde Zumrut, da zanîn ku wan daxwazên xwe di dosyayekê de amade kiriye û wiha pêde çû: “Dema em diçin serdana van sazî û nûneran, em van dosyayên ku me daxwqazên xwe têde nivîsandiye pêşkêşî wan dikin. Em naveroka van dosyayan bi devkî jî bi saziyan re parve dikin. Em daxwaz û heviyên xwe bi wan re parve dikin. Em diyar dikin ku rola Fransayê di çareseriyê de girîng e. Ji ber vê yekê em dixwazin Firansa di aliyê çareseriyê de dîsa rola xwe bilîze. Ji bo statuya gelê kurd bê qebûlkirin û Rêber Apo azad bibe, divê Fransa rola xwe rast bilîze. Em ji parlamenterên ewropayê dixwazin ku pirsnameyan bidin meclisê û van êrîşan têxin rojeva xwe. Em te dizanin ku pirsgirêka Rojhilata Navîn bêyî naskirina vîna kurdan nayê çareserkirin. Rojava jî mînaka çareseiryê ye. Li ser vî esasî, meşa Strasbûrê berdewam dike.”
Bi salan ciwan li Ewropayê dimeşin
Zubeyde Zumrut, bal kişand ser têkoşîna ciwanan a li Ewropayê jî û wiha got: “Ciwan bi salan e wekî kevneşopişekê li Ewropayê li dijî 15ê Sibatê û rojên girîng meşên girseyî li dardixin. Îsal dîsa ciwanên kurd û ciwanên enternasyonalîst dê di 9ê Sibatê de kom bibin û tev li meşê bibin. Dê li bajarê Heilbronn ê Elmanyayê kom bibin. Wê di 10ê sibatê de jî berê xwe bidin Strasburgê û dest bi meşê bikin. Milê ciwanên enternasyonalîst û milê meşa dirêj dê di 14ê Sibatê de li Strasbûrgê bigêjin hev.”
Ev meş meşa azadiyê ye
Zubeyde Zumrut, li ser plansaziya giştî jî rawestiya û ev agahî parve kirin: “Ji xeynî van meşan plansaziya giştî heye. 15ê Sibatê îsal ji bo me dîrokî ye. Me ji bo meş û mîtînga 15ê Sibatê ya Strasbûrgê plansaziyên giştî kirine. Wê bajarên li Ewropayê tev beşdarî vê meşê bibin. Em dibêjin ev meş lazim e ji meşa 17ê Cotmehê û 16ê mijdarê xurttir û girseyîtir be. Ji ber wateya dîrokî ya 15ê Sibatê bêtir e. Ji ber ku li aliyekî bi Rêber Apo re hevdîtin heye. Malbatê hevdîtina yekem pêk anî. Du caran jî heyet çûn. Lê ev hevdîtin têr nake. Ji ber ku tecrîd didome. Wekî gelê kurd em her roj ji bo azadiya Rêber Apo dimeşin û têdikoşin. Gelê kurd ji bo statuya xwe û nasnameya xwe, her wiha ji bo statuya Rojava di rêyan de ye. Ev meş meşa azadiyêye.”
‘Tecrîd didome’
Zubeyde Zumrut, da zanîn ku Rêberê PKKê Abdullah Ocalan hêj di şert û mercê tecrîdê de dijî û wiha wiha pêde çû: “Hîn şert û mercên Rêber Apo çareser nebûne. Raste ev hevdîtin dîrokî ne. Lê ev hevrîtin ji bo çareseriyê têr nake. Me wekî kurd û dostên kurdan ji van hevditinan gelek kelecan û moral girt. Me silav girt. Lê hîn tecrîd didome. Heta ku dîwarê Îmraliyê neyê hilweşandin û Rêber Apo bi awayekî fizîkî azad nebe, ev tecrîd e.”
Zubeyde Zumrut, li ser şert û mercan jî rawestiya û wiha pêde çû: “Divê şert û merc bên avakirin. Êdî tecrube û cerebeyên kurdan heye. Di bangên Rêber Apo de jî her tişt zelal e. Di sala 2013an de dîsa bang kir. Wê demê pêvajo bi yek alî hat meşandin. Aliyek di tecrîd û şertê giran de bû, aliyê din jî xwedî hemû derfet bû û azad bû. Pêvajoya çareseriyê di bin tecrîdê de pêk nayê. Divê şert û mercên herdu aliyan bi her awayî wek hev bin. Eger sazî, heyet û dewlet dê biçin bi Rêber Apo re hevdîtinan bikin cihê Rêber Apo Girava Îmraliyê nîne. Divê şert û merc li gorî ku Rêber Apo karibe berfireh hevdîtinan bike şert bêne avakirin. Divê Rêber Apo karibe bi nûnerên civakê, rêxistinên sivîl, nûnerên jin û ciwanan re karibe hevdîtinan bike û fikrên wan bistîne. Divê Rêber Apo azad vê pêvajoyê bimeşîne.”
Zubeyde Zumrut, bilêv kir ku gava duyemîn jî divê Dewleta Tirk mafê heviyê pêk bîne û wiha lê zêde kir: “Ev maf hatiye dayîn. Ji ber vê yekê divê di aliyê hiqûq û zagonan de Tirkiye gavan bavêje. Eger dewleta tirk xwedî projeya aştî û çareseriyê be divê gavan bavêje. Eger ji bo pirsgirêka kurd li çareseriya demokratîk digere, divê bi lez û bez komîsyona çareseriyê ava bike û hemû pêkhateyên civakê di nava vê komîsyonê de cih bigire. Divê di aliyê zagon, hiqûq û siyasî de bingehek bê avakirin. Divê hemû bar û hemû karê çareseriyê li ser pişta Rêber Apo re neyê hiştin. Em di asta ewropayê di nava hewldanekê dene. Ev hewldan ji bo em destê Rêber Aİpo xurt bikin û di aliyê fizikî de şert û mercên Rêber Apo baş bikin pêk tê. Ji bo vê yekê bêtir têkoşîn divê. Eger îro 3 caran hevditin bi Rêber Apo re hatibe kirin û dest dirêjî kurdan dikin, ev bi xêra têkoşînê ye. Têkoşîna gelê kurd û Rêber Apo rojevek ava kir. Ev têkoşîn ket rojeva gelê cîhanê. Rêber Apo û pirsgirêka kurd îro di asta cîhanê de di rojevê de ye. Ji bo çareseriyê divê hikûmeta AKP-MHPê jî di vê astê de ji bo çareseriyê gavên şênber bavêje.”
‘Dê peyamên girîng bidin’
Zubeyde Zumrut, li ser mîtînga Strasbûrg jî rawestiya û got: “Strasbûrg ji bo ewropayê girîng e. Ji ber ku CPT û Konseya Ewropa li Strasburgê ye gelek girîng e. Hemû saziyên ewropayê li wir in. Ji ber vê yekê peyamên ji wir bilind bibin girîn in. Em ê di wê pîtîngê de peyamekê bidin ewropayê û yekê jî bidin Tirkiyeyê. Dostên kurdan, parlamenterên Ewropayê û gelek dost dê beşdar bibin.
Peyamên ku bê dayîn; yek dê li ser pêvajoyê axaftin bên kirin. Peyama herî girîng tevlêbûna gel û girseyê ye. Gel çiqas xurt û bi girseyî beşdar bibe dê ew qas peyamek xurt bide. Dewletên ewropayê girseyê esas digirin. Ji ber vêyekê em ji bo beşdarbûnê zêde li ser hûr dibin. Gelê kurd 40-50 salin ji bo mafê xwe li ser piyan e û têdikoşe. Li ewropa her roj çalakî heye. Roja çalakî tune be tune ye. Niha ji bo mîtîngê em kar û xebatên xwe dikin. Di aliyê teknîkê û wesayitan de amadekariyên me hene. Dê dîsa gelek kes derfetên xwe têxin meriyetê. Amadekarî bi piranî hatiye kirin. Her res li heviya vê rojê ye. Her kes li benda vê roja mîtîngê ye. Mîtînga 15ê sibatê ji bo her kesî dîrokî ye. Jibo rojhilata Navîn rojeke dîrokî ye. Kurd vê rojê wekî roja reş pênase dikin. Lê di sala 26an dê gelê kurd bikin roja xweş. Dema me îsal ev xebat da meşandin, me got kesên dixwazin di nava ronahî û azadiyê de bijîn, divê em bi hevre vê rojê bikin roja azadiya Rêber Apo. Em ê vê rojê bi beşdariya xwe ronî bikin. Em ê îsal nokteya dawî dînin. Ji ber ku divê êdî azadî neyê taloqkirin. Azadî ji bo gelê kurd wekî xwarinê bi lez û bez lazim e. Em ê 15ê Sibatê bikin azadiya Rêber Apo. Azadiya gelê kurd û naskirina statuya Rojava û çareseriya pirsgirêka kurd.”
‘Divê her kes rola xwe bilîze’
Zubeyde Zumrut jî herî dawî bang kir û got: “Rêber Apo dîsa berpirsiyarî daye ser milê xwe. Lê divê êdî ji bo çareseriya demokratîk her kes rola xwe bilîze. Divê êdî her kes rola xwe bilîzin. Di aliyê rêxistinkirin, beşdarkirina mîtîngê û her alî de rola xwe bilîzin. Em ê di 15ê sibatê de vîna xwe diyar bikin. Kurd her dem ji bo aştiyê dest dirêj kirine. Rêber Apo ji 1988an, 1993an û heta niha her dem ji bo çareseriyê ket nava hewldanan. Ev cîhan û alem dizane. Divê her kes dora xwe bi rêxistin bikin û bikijin qada Strasbûrg e. Ev beyana vîna azadiyê ye. Em bibêjin çawa Rêber Apo amade ye, em jî amade bin.”
