Hevserokê DFGê Selman Çîçek bi boneya salvegera kuştina Aziz Koylûoğlu axivî û got: “Ji ber Azîz Koyluoglû rastiyên ji Rojava û Bakurê Kurdistanê parve dikir hat hedefgirtin. Em ê bi rêxistinbûnê hesabê bipirsin.”
Li Kurdistan û Rojhilata Navîn plansaziyên dagirkeriyê, mêtingeriyê, tunehesibandin çand, bawerî û neteweyan plansaziyên hêzên hegemon didomin. Li dijî polîtîkayên ku gelen tune dihesibînin û rastiya civakan li gorî van berjewendiyan digirin dest rojnameger bi ragihandina rastiyan ve di navbera gel û rastiyan de dibe pireke rastiyan û heqîqetan. Hêzên hegemon û herêmî yên nijadperest, sermayedar, radîkal ji ber vê erk û berpirsyariya rojnamegeran hedef digirin û naxwazin rastî bigihin gel û heqîqet derkevin holê.
Rojnameger Azîz Koyluoglû di 27’ê Çileyê de li navçeya Ranyayê ya Silêmaniye ya Herêma Federe ya Kurdistanê di encama êrişa SÎHAyên Tirkiyeyê ve hat qetilkirin. Di deyemîn salvegera qetilkirina Rojnameger û mamosteyê Çapemeniya Azad Azîz Koyluoglû Hevserokê Komeleya Rojnamegeran a Dîcle Firatê (DFG) Selman Çîçek ji ajansa me re axivî.
‘Ya tê hedefgirtin rojnamegerî ye’
Rojnameger Selman Çîçek destnîşan tevî ku li ser wesatîya Rojnameger Azîz Koyluoglû tê de bû çapemenî dihat nivîsandin hate qetilkirin û derbarê sedema qetilkirina rojnamegeran de ev tişt gotin: “Di dema Azîz Koyluoglû hatiye qetikirin, rojnameger Nazim Daştan û Cîhan Bîlgîn jî hatin hedefgirtin. Hem Azîz, hem Nazim hem jî Cîhan rojnamegerên ku geşedanên li Rojava û Bakurê Kurdistanê ji gel re radigihandin. Rojnamegerên ku ji gel re heqîqetê parve dikirin bûn. Nûçeyên ku çêdikirin bala cîhanê dikişand û dem bi dem nûçeyên ku çêdikirin gelek deng jî vedida. Ji ber vê yekê hatin hedefgirtin. Ya rastî ya di şexsê Azîz, Nazim û Cîhanê de hatiye hedefgirtin rojnamegerî bû.”
‘Ji ber berjewendiyên xwe bêdeng dimînin’
Selman Çîçek têkildarî doza piştî qetilkirina Rojnameger Azîz Koyluoglû diyar kir di hêla darizandinê de hin hewldanên wan çêbûne. Selman Çîçek diyar kir ku saziyên navneteweyî di vê mijarê de bêdeng dimînin û ev tişt gotin: “Divê em ji bîr nekin ku bêdengî ne bêalîbûn e, hevkariya sûc e. Welatên din ji ber têkilî û berjewendiyên xwe bi Tirkiyeyê re hene, kuştina rojnamegerekê re wek nedîtî nêz dibin, tenê gumanên xwe û daxuyaniyên xwe yên şermezarkirinê re sînordar dimînin. Lê belê em wek xebatkarên çapemeniya azad dê çi bibe bila bibe em ê ji bîr nekin û dê hesabpirsîna vê yekê bidomînin.”
‘Hikûmet nedîtî nêz dibe’
Di berdewama axaftina xwe de Selman Çîçek ser rewşa şert û mercên ku rojnameger dixebiti sekinî û wiha pê de çû. “Di hêla ewlehiyê de li Tirkiyeyê rewş tarî ye. Ji xwe li Tirkiyeyê azadiya çapemeniyê nîn e. Li cîhanê jî di vê hêlê de maye dawiyê. Li vî welatî rojnamegerê bi navê Hakan Tosûn di nîveka kolanê de bi lêdanê hate qetilkirin. Û têkildarî mijarê tu daxuyaniyên hikûmetê jî çênebûn.”
‘Em ê bi berpirsyariya wan rabin’
Selman Çîçek têkildarî bêdengiya saziyên çepemeniyê û metirsiya ji bîrkirina bûyerê de wiha got: “Çapemeniya azad duh hesaba van qetilkirinan pirsî û dê ji îro pê de jî hesabê bipirse. Ji ber em mîrateya hevalên me yên rojnamegeran hildigirin. Em vê berpirsyariyê hildigirin. Em bi vê berpirsyariyê radibin, em ê kamera û pênûsên wan jî li erdê nehêlin.”
‘Em ê bi rêxistinbûnê hesabê bipirsin’
Selman Çîçek bal têkildarî têkoşîna li dijî polîtîkayên bêcezahiştinê de bal kişand ser grîngiya hevgirtinê û wiha derbirî: “Divê em têkoşîna hevpar hêj mezintir bikin. Em çiqas li hemberî van kuştinan bi rêxistinkirî bin û têkoşînê mezintir bikin em ê ewqas hesaba vê qetilkirinê bipirsin.”
