Li navçeya Tetwanê ya Bedlîsê, tevî barîna baranê jî bi hezaran kes ji bo pîrozkirina Newrozê li qadan bûn. Di pîrozbahiyê de peyama “yekîtiya neteweyî” û “azadiyê” derket pêş.
Bedlîs – Li navçeya Tetwanê ya Bedlîsê, pîrozbahiya Newrozê ya ku bi şiarê “Newroza Azadî û Demokrasiyê” hate lidarxistin, bi coşeke mezin derbas bû. Gelê ku ji ber avahiya DEM Partiyê ya Tetwanê dest bi meşê kir, li Qada Newrozê ya fuarê gihiştin hev û agirê Newrozê geş kirin.
Pîrozbahî di bin baraneke dijwar de saet di 10.00’an de dest pê kir. Bi sedan welatiyên ku bi cil û bergên xwe yên kurdî û rengîn qad tijî kirin, bê navber dirûşmên “Bijî Serok Apo”, “Bê Serok Jiyan Nabe” û “Şehîd Namirin” berz kirin. Piştî deqeyeke rêzgirtinê ya ji bo bîranîna kesên di têkoşîna azadiyê de jiyana xwe ji dest dane, govend hate gerandin.
Çandar: Azadiya birêz Ocalan azadiya me hemûyan e
Parlamenterê Amedê yê DEM Partiyê Cengiz Çandar di pîrozbahiyê de axivî û bal kişand ser girîngiya aştiyê. Çandar diyar kir ku Newroz ji bo gelê Kurd destpêka jiyaneke nû ye û wiha got: “Em vê Newrozê wekî Newroza aştî û demokrasiyê pîroz dikin. Birêz Abdullah Ocalan di peyama xwe de dibêje; ‘Em dikarin kaosa li Rojhilata Navîn veguherînin qada azadiya gelan.’ Heta ku Abdullah Ocalan azad nebe, em jî azad nabin. Em ê hevalên xwe yên mîna Bese Hozat û hemû girtiyên azadiyê di nava xwe de bibînin.”
‘Agirê Newrozê dê bibe deriyê jiyana nû’
Parlamentera Şirnexê ya DEM Partiyê Newroz Uysal Aslan jî bal kişand ser peyama yekîtiyê û got ku daxwaza wan a sereke azadî ye. Aslan axaftina xwe wiha domand: “Gelekî ku hebûna xwe daye qebûlkirin, niha ji bo azadiya Abdullah Ocalan li qadan e. Ev agirê Newrozê dê bibe deriyê jiyaneke nû û azad. Em ê bi yekîtiya Kurdan jiyaneke nû ava bikin. Ev Newroz dê bibe Newroza yekîtî û aştiyê.”
Piştî axaftinan, Koma Çiya û hunermend Cesim Başboğa derketin ser dikê. Gel bi stranên şoreşgerî û gelerî govend gerandin û Newroz bi coşeke mezin bi dawî bû.
