Êrîşên komên girêdayî hikûmeta demkî ya Şamê yên li ser taxên Helebê, li Manîsayê hatin şermezarkirin.
Girseya ku li ber avahiya Navçeya Şehzadelerê ya DEM Partiyê kom bû, bi pankartên “Xwedîderketina Rojava, xwedîderketina mirovahiyê ye” û “Rojava wijdan e, berxwedan e, azadî ye” li hember êrişên li ser taxên Şêxmeqsûd û Eşrefiyeyê yên Helebê bertek nîşan da.
Daxuyaniya çapemeniyê ji aliyê Hevseroka DEM Partiyê ya Manîsayê Evîn Gunselê ve hate xwendin. Evîn Gunselê diyar kir ku êrişên komên çekdar ên girêdayî hikûmeta demkî ya Şamê li Bakur û Rojhilatê Sûriyeyê li taxên kurdan ên Şêxmeqsûd û Eşrefiyê yên li Helebê rojane berdewam dikin.
Evîn Gunselê ji Navçeya Şehzadelerê ya Manîsayê bang li gel kir ku bi hev re piştgiriyê bidin û got: “Em ê berxwedana li ser perspektîfa civaka demokratîk, parastina destkeftiyên gelan û têkoşîna ji bo rawestandina qirkirinan bidomînin. Em ê li hember tiştên qewimîn bêdeng nemînin.”
Dema daxuyanî hate xwendin girseyê dirûşmeyên “Bijî berxwedana Rojava” û “Gelê Rojava ne tenê ye” berz kirin. Daxuyanî piştî dirûşmeyan bi dawî bû.
