Dayika endamê Komîteya Navendî ya PKKê û fermandarê gerîla Metîn Arslan, Fadîle Arslan diyar kir ku ew bi kurê xwe serbilind e.
HPGê di daxuyaniya 11ê Tebaxê de ragihandibû ku fermandarê gerîla Metîn Arslan (Koçero Ûrfa) 4ê Mijdara 2019an di êrışa hewayî de jiyana xwe ji dest daye.
Ji bo Metîn Arslan li gundê wî li Amarayê ya navçeya Xelfetî ya Rihayê şîn hate danîn.
Di roja destpêkê de girseya gel serdana malbata Arslan kir û sersaxiyê ji wan re xwest.
Dayika Metîn Arslan, Fadîle Arslan anî ziman ku 33 sal in wê nekaribû kurê xwe bibîne û got: “Mirov qala mirovatiya Metîn bike, wê têrê neke. Li Nîzîpê ma, li wir xwend, bi hevalên xwe re baş bû. Li Îzmîrê mafê xwendina zanîngehê bi dest xist, çû wê derê. 33 sal in min nekarî agahiyê jê werbigirim. Ez bi wî serbilind im. Çi serfiraz im ku min ewladekî welê mezin kiriye.”
