Gelê Wanê di saetên serê sibehê de amadekariyên xwe kirin û ji tax û kolanan kom bi kom berê xwe dan Qada Newrozê. Herikîna gel a qada Newrozê didome.
Newroz îro dê li 10 navendan bi dirûşma “Rêbertiya Azad Civaka Demokratîk” bi girseyî bê pîrozkirin. Yek ji navendên ku bi sed hezaran gel bi hevre Newrozê pîroz dike bajarê Wanê ye. Her sal li Wanê bi beşdariya sed hezaran kesan Newroz tê pîrozkirin. Qada pîrozbahiyê ya Newroza Wanê îsal jî neguherî. Pîrozbahî, li quntarê Keleha Wanê tê pîrozkirin. Welatiyên Wanê di saetên serê sibehê de berê xwe dan Qada Newrozê. Welatî şeveqê ji xew rabûn û bi cil û bergên kurdî xwe xemilandin û kom bi kom berê xwe dan Qada Newrozê. Ne tenê ji navenda bajar, ji navçe û gundan jî bi hezaran kes diherikin qada Newrozê. Hinek welatî bi meşê û hinek welatî jî bi wesayîtên şaredariyê û yên şexsî ber bi qada Newrozê ve diherikin. Hejmareke zêde ya jin û ciwanan beşdarî pîrozbahiyê bûne û piraniya wan jî cil û bergên Kurdî li xwe kirine.
Coşa li qadê zêde dibe
Bi hatine gel re têketina qadê ji 4 noqteyan dest pê kir. Welatî, li ber stranên Kurdî govendê digerînin û bi coş Newrozê pîroz dikin. Coşa li qadê û girseya gel her ku diçe zêdetir dibe. Li qadê flamayên bi rengên kesk, sor û zer li ba ne. Li qadê gelek caran dirûşma “Bijî Serok Apo” olan dide.
Hevseroka Giştî ya DEM Partiyê Tulay Hatîmogûllari, Hevserokê Giştî yê DBPê Keskîn Bayindir, endama Şandeya Îmraliyê û Wekîla Wanê Pervîn Buldan, endamê MYKa KKPê Sînan Çîftyurek, Hevşaredarên Bajarê Mezin ên Wanê Neslîhan Şedal û Abdullah Zeydan û gelek siyasetmedar dê di pîrozbahiyê de biaxivin. Di heman demê de hunermend Rojda, Arhat û Fîkret Goyî dê derkevin ser dikê.
