Girtiya nexweş a 82 salî Hanîfe Arslan ku di girtîgeha Tîpa T a Wanê de dima, ji girtîgehê derket. Hanîfe Arslan li ber deriyê girtîgehê axivî û got: “Em aştiyê dixwazin, em naxwazin êdî xwîn birije.”
Girtiya nexweş a 82 salî Hanife Arslan, di sala 2022an de bi îdiaya “endamtiya rêxistinê” 6 sal û 3 meh cezayê girtîgehê lê hat birîn û ew girtin. Hanîfe Arslan a ku nexweşiyên weke KOAH, tansiyona bilind, şekir û gelek nexweşiyên din lê hebûn, di saetên serê sibê de ji ber ku cezayê xwe xelas kir ji Girtîgeha Tîpa T a Wanê tehliye bû. Malbata Hanîfe Arslan li ber deriyê girtîgehê ew pêşwazî kir.
‘Em aştiyê dixwazin’
Hanîfe Arslan, li ber deriyê girtîgehê axivî û bi bîr xist ku ew dayika aşitiyê ye. Hanîfe Arslan, destnîşan kir ku ew aştiyê dixwazin û wiha berdewam kir: “Em naxwazin xwîn birijê. Bila êdî dayik negirîn, bila deriyê zîndanan vebe û hemû girtî serbest bên berdan. Girtiyên ku niha di zîndanan de ne hemû jî bêsûc in. Kesên li ba min diman hemû jî gelek ciwan bûn, ya herî mezin 30 salî bû. Ez dixwazim ev hemû bên berdan.”
Bal kişand ser pêvajoyê
Keça Hanîfe Arslan Îran Çaba jî axivî û wiha got: “Ji ber ku me dayika xwe dît, em kêfxweş in. Lê ji ber girtiyên din ên hêj di zîndanê de ne ev kêfxweşiya me nîvco ma. Dayika min dayika aştiyê ye û tekoşîna aştiyê dide. Ev bi salan e mûameleya keseke sucdar dibîne û wextê xwe yê ku divê li cem zarok û neviyên xwe be, di girtîgehê de derbas kir. Ev tişt me gelekî xemgîn dike. Lê em dîsa jî aştiyê dixwazin. Em dixwazin ev pêvajoya niha ya “hêviyê” bi aştiyê bi encam bibe. Hêvî dikim dayika min girtiya dawiyê be.”
