Rêveberê GOÇ-DERê Hasan Erzî polîtîkayên li ser koçberkirinê û jiyana koçberiyê wiha got: “Îro dewlet polîtîkayê koçberiyê li ser kurdan disepîne. Bi zagon û plansaziyên xwe dixwazê cîh û warê kurdan vala bike.”
Li gor daneyên Saziya Îstatîskê ya Tirkiyeyê (TUİK) di sala 2024an de li Tirkiyeyê 151 hezar welatiyên Tirkiyeyê 273 hezar û 205 welatiyên biyanî jî Tirkiyeyê koçî welatên derve kirine. Temenê kesên ku koçî derveyî welat kirine ji sedî 14.4ê welatiyan 20-24 sali û ji sedî 12.1 welatî jî jî di navbera 25 û 29 salî ne. Li aliyê din di heman salê de 314 hezar û 588 welatî jî ji derve koçî Tirkiyeyê kirin. Ji kesên ku ji derve hatin Tirkiyeyê 103 hezar û 732 kes welatiyên Tirkiyeyê ne. 210 hezar û 856 kes jî welatiyên biyanî ne. Li gorî raporên mafên mirovan piraniya welatiyên koçî derveyî welat kirine ji ber şerê taybet, aborî û darizandinê neçar mane ku koçî derveyî welat bikin.
Rêveberê Komeleya Lêkolîn û Şopandinê ya Mezopotamyayê (GOÇ-DER) Hasan Erzî li ser politikayên koçberiyê û penaberiyê ji Ajansa Welat axivî.
Rêveberê GOÇ-DERê ya Amedê Hasan Erzî diyar kir ku armanca zagonên dewletê ew e ku gelê Kurd bide xilaskirin û wiha got: “Dewleta Tirk polîtîkaya xwe ewilî ji koçberiyê dide destpêkirin. Komkujiya Ermeniya, Geliyê Zîlan, serhildana Sason, terteleya Dêrsîm, fermana Şengalê ewilî bi polîtîkayên koçberiyê dest pê kirine.”
Hasan Erzî, li ser valakirina gundên li Kurdistanê jî rawestiya û wiha axivî: “Di salên 1995-1999an de nêzî 2 hezar gundên kurdan hatin valakirin û şewitandin. Welatiyên ku gundên wan hatin şewitandin û valakirin koçî metrepol kirin. Piştre koçî Ewropayê kirin. Gund bi hukmê zorê û spartina pergala cerdewaniyê vala kirin. Yên ku gundê xwe vala nekirin, gundê wan şewitandin û bi kuştinê gef li wan xwarin.”
Erebê Basrayê li Kurdistanê çi dikin?
Hasan Erzî bal kişand ser encama polîtîkayan dewletê yên koçberiyê û wiha lê zêde kir: “Li Dêrsîmê bedela herî giran malbata Kemal Kiliçdaroglu daye. Lê mixabin îro mirov li Kemal Kiliçdaroglu dinêrî agahiya wî ji warê wî û nasnameya wî tune ye. Ev jî sedema politikaya dewletê ye.
Îro Erebê Basrayê hatine li Sason, Kozluk, Bêdlîs, Motkiyê bi cih bûne. Ereb li van bajaran çi dikin? Tirkmenên li Wanê ji ku hatine? Kê ew anîne. Ev polîtîkaya dewletê ye.”
‘Li welatê xwe bijîn’
Hasan Erzî diyar kir ku Rêberê Gelê Kurd Abdullah Ocalan bang li hemû Kurdan kiriye û xwest dewlet gavên şênber li gorî vê bangê biavêje û wiha pêde çû: “Rêberê Gelê Kurd Abdullah Ocalan ev bang ji bo hemû gelê Kurd ên li dîasporayê kiriye. Em bi Rêberê xwe bawerin. Lazime em bibin xelek û li dora Rêberê Gelê Kurd Abdullah Ocalan û banga wî tom bibin. Proje û plansaziyên Rêberê Gelê Kurd Abdullah Ocalan divê teqez bikeve meriyetê. Ji temamî xort, ciwan û keçên Kurdan re banga me, li welatê xwe bin û li welatê xwe bijîn. Parlamenterên me yên ji ber ceza çune derveyê welat, lazime piştevaniya gelê me yê Ewropa bikin. Serok dibêje ‘Li şûna jiyana Ewropayê ez jiyana li Îmraliyê tercih dikim’ û peyamek girîng dide koçberan.
‘Bila pêşî pergala cerdevaniyê rakin’
Rêveberê GOÇ-DERê Hasan Erzî, herî dawî li ser zagonên tên çêkirin û vegera welat axivî û got: “Dewleta Tirkiye yê zagonek derxistiye. Kîjan gundî vala dike, bi deh hezaran kesên biyanî tînin li wî gundî bi cih dikin. Almanyayê jî zagonek nu derxistiye. Hemû welatiyên biyanî dîsa li welatê wan vedigerîne. Heger dewlet samimî be divê di sêrî de gavên şênber biavêje. Divê ewil pergala cerdevaniyê rake. Îro li Kurdistanê bi hezaran cerdevan hene. Pevajoyekê dest pê kiriye. Pêvajoya Aşti û Civaka Demokratîk. Em ji gelê xwe re dibêjin werin. Lê heta ku pergala cerdevaniyê bidome, Kurdên koçber bûne dê çawa vegerin warê xwe. Ev pirsgirêkeke herî mezin e.”
