Amed – Siyasetmedar û nivîskar Hasan Ozguneş diyar kir ku firsendên dîrokî ketine destê Kurdan û got: “Divê herkes bêhincet, her tiştî bide aliyekî û yekîtiyek xurt li Rojava xwedî derkevin.”
Li Sûriyeyê piştî Îranê û Rûsyayê hêzên xwe paşve kişandin, di 27ê Mijdarê de Heyet Tehrîr El Şam (HTŞ) li dijî Heleb û gundên wê dest bi êrîşan kir û di çar rojan de Heleb bi dest xist. Piştrî çend rojên din vê carê Hama û Hemis bi dest xistin. HTŞ herî dawî di 8ê Kanûnê de ket Şamê û Rejîma Baasê hilweşand. Di vê pêvajoya HTŞê bajarên Sûrî bi dest xist, li aliyekî Hêzên Artêşa Şamê xwe paşve kişand û li aliyê din jî komên biçek ên wekî Artêşa Neteweyî ya Sûrî (ANS) Ceyş El Vatanî, Artêşa Sultan Murad û komên din ku hêza xwe ji Tirkiyeyê digirin êrîşî Til Rifat, Şehba, Minbic û gelek bajarên din ku pergala Rêveberiya Xweser lê heye, kir. Ji ber êrîşên van komên çekdar, zêdeyî sed hezar şêniyên Efrinê ku koçî Şehbayê kiribûn, dîsa neçar man ku koç bikin û li Tebqa û Reqa bi cih bibin. Ji 27ê Mijdarê heta niha Tirkiye û koma paramîlîter Artêşa Neteweyî ya Sûriyeyê (ANS) êrîşên li ser Bakur û Rojhilatê Sûriyeyê didomînin. Di navbera şervanên HSDê û komên girêdayî Tirkiyeyê de pevçûnên dijwan diqewimin. Li aliyê din li bakurê Kurdistanê ji bo piştgiriya Bakur û Rojhilatê Sûriyeyê li ser sînorên Qamişlo û Kobanê çalakiyên nobedê tên lidarxistin. Nobeta sînorê Nisêbînê ku di 13ê Kanûnê de dest pê kiriye 18 roj in didome. Nobeta Pirsûsê jî ku di 23ê Kanûnê de dest pê kiriye, 8 roj in didome. Heta niha nûner û rêveberên DBP, DEM Partî, TJA, Dayikên Aştiyê, sendîka, rêxistinên sivîl û civakî û gelek saziyên din ji Şirnex, Êlih, Sêrt, Bêdlis, Mûş, Amed, Semsûr, Mêrdîn, Riha û navçeyên wan bi girseyî çûn ser sînor û li ser sînor piştgirî dan gelê Rojava. Çalakî bi girseyî didome.
Nivîskar û Parlementerê HDPê yê berê Hasan Ozguneş der barê geşedanên li Sûriyeyê, êrîşên dewleta Tirk û nobeta ser sînor ji Ajansa Welat re axivî. Hasan Ozguneş balkişan ser proje û planên hêzên emperyalîst ên li ser Rojhilata Navîn û wiha got: “Ewlehiya Îsraîlê ji bo wan meseleyeke bingehîn e. Piştî sosyalizma reel têk çû hêzên emperyalîst, moderniteya kapîtalîst xwestin li Rojhilata Navîn projeya Rojhilata Navîn a Mezin bixin meriyetê. Xwestin dewlemendiyên ser erd û bin erd ên Rojhilata Navîn desteser bikin. A din jî ew dewletên ku teslîmî wan nebûn xwestin teslîm bigirin. Dîsa ewlekariya Îsraîlê ji bo wan gelekî girîng e.”
Dewletên netewperest nikarin xwe biguherin
Hasan Ozguneş anî ziman ku dewletên netewperest hişmendiya xwe naguherînin û wiha axivî: “Dewletên mêtinger ku li ser hîmê yek netew, yek bawerî ava bûne; nikarin guhertin û veguhertinê pêk bînin û xwe demokratîk bikin. Nikarin bibin dewletên hiquqî, azadîxwaz û pirsgirêkên civaka xwe çareser bikin. Wek dara hişk in. Mixabin encax bi karesatên mezin têne guhertin. Niha Suriyeyê jî bivî awayî hat guhertin. Ev guhertin jî bi mudaxaleya Amerîka, Ingilistan, Îsraîl, Rusya, Îran û Tirkiyeyê pêk hat. Niha rejîmeke dîktator çû. Lê dê çi dînin şûna vê rejîmê ne diyar e. HTŞ, qaşo Artêşa Neteweyî ya Sûriyê ye, hişmendiya van a DAIŞê ye. Bi vê hişmendiyê nikarin ev qas civakeke pir rengî bi rêve bibin.”
‘Rojhilata Navîn di qeyraneke kûr de ye’
Hasan Ozguneş destnîşan kir ku hêzên emperyalîst Îran ji bo Îsraîlê xetere dîtin û ji bo wê jî mudaxaleyî Sûriyeyê kirin û wiha domand: “Hêzên emperyalîst yên ku mudaxaleyî Sûriyê kirin xwestin Sûriye heta demekê di nava aloziyê de be. Dê pişt re jî mudaxaleyî Îranê bikin. Dixwazin dewletên ku li hember wan disekinin biguherînin. Em niha di rewşa Sûriyê de dikarin bibêjin Rojhilata Navîn di nav qeyraneke kûr de ye. Niha Durzî, Suryan, Ermen, Xiristiyan, Êzidî, Kurd di bin xetereyê de ne. Ji ber ku em baş dizanin li gel HTŞ û ANSê tu wijdan, exlaq, demokrasî, azadî, wekhevî, mafê jinan, mafê mirovan tune ye.”
‘Çareserî neteweya demokratîk e’
Hasan Ozguneş da zanîn ku tenê hêza xwedî tecrube Rêvebariya Xweser û Hêzên Sûriyeya Demokratîk e û wiha axivî: “Rêveberiya Xweser 13 sal in bi hişmendiya neteweya demokratik Bakur û Rojhilatê Sûriyê bi rêve dibe. Hemû gel û bawerî, jin bi awayekî azad li wir dijîn. Tekane çareserî ev model e. Lazim e ev model ji bo hemû Sûriyeyê bibe mînak. Ji bo vê jî pêwîst e em hemû gelê Kurd, hêzên demokratîk û aştîxwaz piştgirî bidin gelên Rojava. Yekitiya xwe pêkbînin, evê pergala neteweya demokratîk li ser Sûriyê ferz bikin. Nehêlin ew kêmnetew û baweriyên li wir rastî komkujiyan werin.”
‘Di di hişmendiya wan de tunekirina Kurdan heye’
Hasan Ozguneş bibîrxist ku Dewleta Tirk hin soz dabûn Kurdan, lê pîştî Lozanê ew soz danîn aliyekî û li ser feraseteke yek netew, nijadperest û neteweperest xwe bi rêxistin kir û wiha pê de çû: “Gelê Kurd û gelên din tevahî xistin ber pêla bişaftin û tunekirinê. Bi vî awayî gotin me çawa Ermen, Asûr û Rûm ji holê rakirin em ê Kurdan jî ji holê rakin. Lê Kurdan di vê sedsalê de dev ji çand, nasname, azadî û nêrîna xwe ya demokratîk berneda. Hê jî di hişmendiya Tirkiyeyê de tunekirina Kurdan heye. Dema li Başûr Kurdan statû bi destxist jî xwestin asteng bikin, heta demeke nêz jî digotin me xeta kir, me wê demê statuya Başûr asteng nekir. Niha jî beşeke Başûr dagirkirine. Di aliyê siyasî, aborî, leşkerî de xistine bin xizmeta xwe. Lê Rojava li gor hişmendiya wan nameşe, li wir pergaleke demokratîk, wekhev heye.”
‘Divê Kurd ji dîrokê dersan derxe’
Hasan Ozguneş da zanîn ku bi salan e Kurd ji bo destkeftiyên xwe biparêzin têkoşîneke mezin didin û wiha pêde çû: “Dîrok her tiştî nîşanê mirov dide. Divê mirov dersê jê bigire. Kurdan sed sal berê ji ber nezanî, xîzanî, bêtifaqî û bêrêxistiniyê winda kir. Lê niha gelê Kurd piraniya wî vê rastiyê dibîne. Divê Kurd li ser esasê nirxên neteweyî bibin yek û destkeftiyên hemû parçeyan biparêzin.”
‘Îro derfetên girîng çêbûne’
Hasan Ozguneş herî dawî bal kişand ser kesên li dijî yekîtiyê û wiha bi dawî kir: “Îro yê ku bikeve bin xizmeta neyaran dîrok dê wan jî şermezar bike. Gelê me jî dê şermezar bike. Îro derfetên girîng ji bo me çêbûne, dostên me pir bûne, hesteke neteweyî heye, firsendeke dîrokî heye, divê herkes bêhincet, her tiştî bide aliyekî hem bibe yek, hem li Rojava xwedî derkeve. Serkeftin nêz e.”
