Amed – Hevseroka Giştî ya DEM Partiyê Tulay Hatîmogûllari di civîna jinan a rêveberiyên cihî yên demokratîk de got: “Em ji vir bang li feraseta qeyûman dikin. Di demeke ku aştiya civakî diaxivin de divê xebatên qeyûman bisekinînin û qanûna ku qeyûman ji holê rake demildest bê çêkirin.”
Partiya Wekhevî û Demokrasiyê ya Gelan (DEM Partî) bi dirûşma “Jin jiyan e, jiyan xwebirêvebirin e. Jiyana azad ji nû ve ava dikin” li eywaneke Çand Amed a li navçeya Yenîşehîr a Amedê civîna jinan a navberî ya rêveberiyên cihkî yên demokratîk li dar xist. Hevseroka DEM Partiyê ya Giştî Tulay Hatîmogûllari, Hevseroka Partiya Herêmên Demokratîk (DBP) a Giştî Çîgdem Kiliçgun Ûçar, Berdevka Meclisa Jinan a DEM Partiyê Halîde Turkoglû, Hevseroka DEM Partiyê ya Amedê Gulşen Ozer, Hevşaredara Bajarê Mezin a Amedê Serra Bûcak, hevşaredarên ku qeyûm tayînî şûna wan hatin kirin û hevşaredarên din û endamên meclisên şaredariyan ên DEM Partî yî tev li civînê bûn. Gelek jin bi cil û bergên xwe yên kurdî tev li civînê bûn. Li eywanê bi zaravayên kurmancî û kirmanckî yên kurdî pankartên “Jiyan jiyan azadî” , “Jiyana azad civaka azad” , “Hevserokatî xeta me ya mor e” , “Bi vîna jinê ber bi bajarên azad ve” , “Demê cinîyan, îradeyê cinîyan” , “Em bi vîn û rêxistinbûna xweser li qadan in” , “Bi vîna jinê ber bi demokrasiya xwecihî ve” , “Pê îradeyê cinîyan ver bi bajaranê azadan” , “Gotina me neqediya; Em ê tundiyê bidin sekinandin” , “Ma bi îrade û rêxistinbîyayîşê xo waran ra yê” hatin daliqandin û jinan dirûşma “Jin jiyan azadî” berz kirin.
‘Em ê di vê pêvajoyê de qeyûman bişînin’
Di civînê de ewilî Hevşaredara Bajarê Mezin a Amedê Serra Bûcak axivî. Serra Bûcak, diyar kir ku di pêvajoyeke girîng de derbas dibin û wiha got: “Em dizanin ku jin kirdeya hemû xebatan e. Em hemû xebatên xwe bi vê perspektîfê dimeşînin. Em jin wiha hesan nehatin van rojan. Gelek ked û têkoşîn hate dayîn. Em ê bi perspektîfa xwe ka rêveberiyên herêmî çawa ne, salek çawa derbas bû em ê binirxînin. Bila ev civîn ji xebatên me re bibe ronahî.” Serra Bûcak, bal kişand ser tayînkirina qeyûman a li şaredariyan û wiha got: “Hevalên me yên ku qeyûm tayînî şûna wan hatin kirin ji roja ku qeyûm hatin tayînkirin heta niha bi me re gelek xebatên xweş meşandin. Em ê di vê pêvajoya ku aştiya civakî ava bikin de qeyûman jî bişînin.”
‘Divê xebatên qeyûman bên sekinandin û hevşaredar werin ser peywîra xwe’
Hevseroka DEM Partiyê ya Giştî Tulay Hatîmogûllari qala dîroka xwerêveberiya cewherî ya partiya xwe kir û destnîşan kir ku di dîroka têkoşîna jinan de gelek bedel hatine dayîn. Tulay Hatîmogûllari bal kişand ser tayînkirina qeyûman û wiha got: “Em ji vir bang li feraseta qeyûman dikin. Di demeke ku aştiya civakî diaxivin de divê xebatên qeyûman bisekinînin. Divê qanûna ku qeyûman ji holê rake bê çêkirin û hevşaredarên ku gel hilbijartine werin ser peywîra xwe. Ev mafê herî xwezayî yê gel e. Di van rojên ku em aştiyê diaxivin de divê dest ji vê rejîma qeyûman were berdan. Em niha dibînin ku li Tirkiyeyê jî qeyûm belav dibe. Em dizanin ku qeyûm tayînî gelek saziyan jî hate kirin. Em operasyona li dijî Şaredariya Stenbolê rast nabînin. Îro pêla çaremin li dijî Stenbolê hate kirin. Em zihniyeta ku darazê weke çûv bikartîne nikarin qebûl bikin. Dema qeyûm hatin tayînkirin ewilî êrişî saziyên jinan kirin.”
‘Em ê heta dawiyê têkoşîna xwe ya azadiyê bidomînin’
Tulay Hatîmogûllari qala xizaniya jinan jî kir û got ku “Em ê destûr nedin ku dest bidin me û destkeftiyên me û em ê weke jin heta dawiyê têkoşîna xwe ya azadiyê bidomînin.” Tulay Hatîmogûllari her wiha behsa xebatên şaredariyên partiya xwe yên derbarê jinan de kir û ew xebat rêz kirin.
‘Banga Birêz Abdullah Ocalan gelekî girîng e’
Tulay Hatîmogûllari bal kişand ser banga Rêberê Gelê Kurd Abdullah Ocalan û wiha domand: “Banga birêz Abdullah Ocalan gelekî girîng e. Îro dema dîroka sed salan dinêrin di pêvajoyeke dîrokî re derbas dibin û dibin şahidê pêvajoyeke dîrokî. Li cihekî ku bedena jinê tê firotin em baş dizanin ku aştî tê çi wateyê. Di vê mijarê de xebatên herî girîng ên ku em bikin ew e ku divê feraseta aştiyê û demokrasiyê bi pêş ve bibin. Divê li bajarên me hemû gel bi awayekî azad bijîn. Divê rêveberiyên xurt bên avakirin. Di demeke ku em aştiyê diaxivin de hewcehî bi axaftina van mijaran heye.”
‘Yekane çareya me aştî ye’
Tulay Hatîmogûllari axaftina xwe bi van gotinan bi dawî kir: “Di vê pêvajoyê de peywîr dikeve ser milê Meclisê jî. Divê qanûna ku qeyûman ji holê rake demildest bê çêkirin. Di serî de dewlet, hemû desthilat xwedî berpirsyarî ye. Me jinan li ser vê axê gelek bedel dan. Êdî bes e em dibêjin aştî, yekane çareya me aştî ye.”
Hevşaredara Akdenîzê Nûriye Aslan a girtî ji ji civînê re silav şandin. Civîn bi awayekî ji çapemeniyê re girtî berdewam dike.
