Mêrdîn – Endamê Lijneya Rêveber ê Komeleya 78an Arîf Tûrgay bal kişand ser peymana di navbera HSDê û hikûmeta demkî ya Sûriyeyê de û got: “Heta ku statuya gelê me yê li Rojava mîsoger nebe, divê her çar aliyê Kurdistanê şiyar be, baldar be û divê çavên me li ser Rojava be.”
Piştî êrişên HTŞê û komên paramîlîter ên girêdayî Tirkiyeyê yên li ser Rojava, gelê Kurd û dostên wan li çar aliyê Kurdistanê û gelek welatên cîhanê daketin qadan û piştgirî dan Rojava. Di demekî ku berxwedana gelê Kurd û dostên wan berdewam dikir de di 30ê Çileyê hate ragihandin ku di navbera Hêzên Sûriyeya Demokratîk (HSD) û Hikumeta Demkî ya Sûriyeyê li ser destkeftiyên Rojava peymanek hate îmzekirin. Peyman di 2yê Sibatê de kete meriyetê. Li gorî lihevkirinê hêzên ewlekariya hundirîn ên girêdayî wezareta hundirîn a hikûmeta demkî derbasî duh bajarên Hesekê û Kobanê bûn da ku entegrasyonê bi rêve bibin û pişt re vekişin. Li Sûriyeyê hevdîtinên li ser peymanê û danûstandinên dîplomatîk dewam dikin. Tê payin ku sibe li bajarê Qamişloyê qedexeya derketina derve bê ragihandin. Hevdîtinên dîplomatîk ên bi Şamê re jî dewam dikin. Di vê çarçoveyê de tê payîn ku şandeya Şamê ya ku li Kobanê û Hesekê hevdîtin kirin îro li Qamişloyê jî hevdîtinekê bike. Li gorî agahiyan, tê payin ku di van mijaran de rojên bê di asta biryarnameyê de gav bêne avêtin.
‘Divê seferberiya hatiye ragihandin berdewam bike’
Endamê Lijneya Rêveber ê Komeleya 78an Arîf Tûrgay têkildarî peymanê û berxwedana gelê Kurd a ji bo Rojava ji ajansa me re axivî. Arîf Tûrgay diyar kir ku bi peymanê pêşî li komkujiyê re hate girtin û wiha got: “Heke ev peyman çênebûna dibe ku di nava Kurdan, Ereban û kêmnetewan de nexweşî çêbûbûna. Ev xetere hêj jî berdewam dike. Ji bo ku ev yek pêk neyê divê em dest ji berxexwedana xwe bernedin. Heta ku garantiyek çênebe divê ev seferberiya hatiye ragihandin berdewam bike.”
‘Gelê Kurd ji bo mirovahiyê li ber xwe dide’
Arîf Tûrgay bal kişan ser berxwedana gelê Kurd a ji bo Rojava û wiha domand: “Gelê Kurd ji bo mirovahiyê li ber xwe da. Dema gelên dinyayê xwedî li şoreşa Kurdan derdikeve esas xwedî li şoreşa xwe derdikevin. Gelê Kurd ji bo aştiya dinyayê gelek bedelên giran dan. Li gelek welatan komkujî pêk hatin. Heke îro gelê Kurd li ber xwe bide ji bo mirovahiyê li ber xwe dide.”
‘Di meseleya Rojava de gelê me yekîtiyek ava kir’
Arîf Tûrgay di berdewama axaftina xwe de ev tişt gotin: “Bi salan e yekîtiya gelê Kurd êşeke giran bû. Lê belê di meseleya Rojava de gelê me di nava hemû rêxistinên Kurdan de yekîtiyek ava kir. Partiyên me yên siyasî hemû hatin cemhev, li Rojava xwedî derketin peyamên pêwîst dan û di vî warî de ji bo yekîtiya Kurdan pêşketineke mezin çêbû. Gelê Kurd dê ji niha û pê ve berxwedana xwe berdewam bike. Heta ku statuya gelê me yê Rojava nekeve bin garantiyekê divê her çar parçeyê Kurdistanê şiyar be, baldar be û çavên me li ser Rojava be.”
Banga yekîtiyê li hemû rêxistinên Kurdistanê kir
Arîf Tûrgay axaftina xwe wiha bi dawî kir: “Divê partiyên me yên siyasî yên li her çar aliyê Kurdistanê bersivê bidin gel. Gel yekîtiya Kurdan dixwaze. Çi partiyên siyasî çi leşkerî divê bersiva vê bidin. Heke tu li Rojhilata Navîn ne biquwet bî tu nikarî bijî. Hêj jî li ser me xetere hene. Kî birêxistin be kî li ber xwe bide ew ê ji vê demê zêde zirarê nebîne. Kî li ber xwe bide ew dê serbikeve. Em bang li rêxistinên li her çar aliyê Kurdistanê dikin ku rojek berî rojekê werin bahev.”
