Li Amedê bi boneya salvegera helbestvanê kurd Arjen Arî bername hat lidarxistin. Heval û hogirên Arjen Arî dan zanîn ku ew ne tenê Arjen Arî bû, ew bi xwe kurd û Kurdistan bû.
Şaredariya Bajarê Mezin a Amedê, Weşanên Sor û malbata Arjen Arî di salvegera vefadkirina Arjen Arî de li eywana Çand Amedê ya navçeya Yenîşehirê ya Amedê kargeh, panel û merasîma xelatdayinê ya pêşbirka helbestê ya Arjen Arî li dar xistin. Destpêka bernameyê bi danasîna kargeha xêz û resiman hate kirin. Piştî ku danasîna kargehê mêvanan dîmenek a ku bi heval, hogir û malbata Arjên Arî re hatibû kêşandin û behsa Arjen Arî û helbestên wî dikirin hate temaşekirin.
Bername bi axaftina malbat û hezkiriyên Arjên Arî berdewam kir. Heval û hogirên Arjen Arî anîn ziman ku ew helbestvan û evîndarê welatê xwe bû. Îro dê çi ji destê wan were ji bo vê mirateya ku Arjen Arî li dû xwe hiştiye yê xwedî derbikevin û her bidin jiyandan. Piştî axaftinan kesên ku tevlî kargehê bûn hatin xelatkirin.
Di berdewama bernameyê de jî bi beşdariya Rêdûr Dîcle, Dr. Roger Acûn, Sidîq Gorîcan panela ku behsa helbestên Arjen Arî kirin hat lidarxistin.
Arjen Arî helbestvan û çîrokbêjekî jiyana me bû
Sidîq Gorîcan bal kişand li ser çîrok, serpêhatî û jiyana Arjen Arî û got çîrokên Arjen Arî parçeyek ji jiyana wî ye û ev tişt got: “Ew di çîrok û serpêhatiyê xwe de jiyana rast hildaye dest û di her çîrok û helbestê wî de parçeya jiyana miletê wî heye. Arjen tu carî xwe sansûr nekiriye. Arjen di serpêhatiyê xwe de tiştên ne girîng tiştên di rêzê de hildaye dest û evjî nîşan dide ku Arjen Arî helbestvan û çîrokbêjekî jiyana me bû.”
Helbestên Arjên Arî motîvasyona lehengiyê ye
Dr. Roger Acûn jî da zanîn ku xwezî Arjen Arî ev roj dîtiba ew ê gelek dilşad bibûya û di berdewama axaftina xwe de behsa zimanê şibandin û îmaja Arjen Arî kir û wiha got: “Îmaja Arjen Arî folklorîk in. Dibe em çend salên din bi pirtûkên Arjen Arî ferhengokekî derxînin ji ber ku zimanê Arjen Arî cûda û kûr e. Helbestên Arjen Arî dîsa kûr û bi wate ye. Helbestên wî hemû orjinal in em vê orjinaliyê di helbestê wî de dijîn bi rastî. Gotinên pêşiyan di helbestê Arjen Arî modern dibin û derdikevin pêşberî me. Helbestên Arjên Arî motîvasyona lehengiyê û motîvasyona gelê kurd jî zêde dike.”
Arjen Arî her tim bi dîrokê re bû û bi dîrokê re dijiya
Di dawiya panelê de Rêdûr Dîcle axivî. Rêdûr Dîcle bal kişand ser parêznameya sosyolojiya azadiyê ya Rêberê Gelê Kurd Abdullah Ocalan û got: “ Abdullah Ocalan di rûpela 170yê de dibêje taybetmendiya herî bingehîn a xwezaya mirovên azad ew e ku dîrokê hilbijêre û bi dîrokê re bijî. Lewre dîrok şîroveya pêvajoya hebûniyê ye. Arjen Arî her tim bi dîrokê re bû û bi dîrokê re dijiya. Îro bakurê Kurdistanê geşedanên pir girîng li ser azadiya gelê kurd û di avakirina civaka demokratîk de diqewimin. Çalakiyek bi vî rengî îsabet û bi qîmete ku kirdeya wê Arjên Arî be. Mirov bi rihetî dikare bibêje netewperestî bes nirxên gel ji xwe re dike amûr û bi kar tîne. Arjen Arî ne netewperest bû ew welatparêzek bû. Ev nirxên ji nû ve avakirina jiyanê ye. Li gor Arjen Arî bîra neteweyi ji haj çand, dirok û zimanê xwe dest pê dike. Bîra neteweyî ne tenê tevgerek û nasnameyek takekesî ye. Bi nasîna civak û gel e. Gotina wî azadiya min a her kesekî, azadiya herkesî azadiya min e ev gotin her tiştî ji me re diyar dike. Bîra neteweyî berfireh hildide dest û ne tenê di çarçoveyek teng de dinirxîne . Pirçandiye û nerîten civaka xwe kiriye yek û hewl daye ji nû ve avakirina civaka xwe bike.”
Herî dawî celata rûmetê bi destê xwişka Arjen Arî Necla Akay re dane endamê Koma Kardeş Turkuler Vedat Yildirim. Bername bi konsera Agît İşik û Kardeş Turkuler bi dawî bû.
