Riha – Maruf Kartalê ku bi rêya KHKê ji kar hatiye dûrxistin diyar kir ku ji roja dest bi kar kiriya heta hatiye ixrackirin ji bo gel têkoşiyaye û got: “Azadiya gel azadiya min e.”
Platforma Konfederasyona Sendikaya Karkerên Cameweriyê (KESK) ji bo kesên ku bi rêya KHKê ji karê xwe hatine dûrxistin ji Amedê ber bi Enqereyê ve bi şîara “Em ê kare xwe paşve bistînin” dest bi meşê kir. Meşa ku di 13ê cotmehê de dest pê kir, dê 5 rojan bidome. Meşa ku duh li Amedê dest pê kir, dê li Semsûr, Dîlok, Edene, Mersîn û heta Enqereyê bidome.
Maruf Kartalê 58 salî, di sala 1991an de li Bitlisê dest bi kar kiriye û 24 salan bênavber di qada tenduristiyê de xebitî ye. Di 29ê Îlonê 2015an de bi rêya KHKê ji karê xwe hatiye dûrxistin. 10 sal in ji bo vegere karê xwe têdikoşe. Di 2018an de ji ber têkoşîna xwe hatiye girtin û 2 salan girtî maye. Niha li dijî bêhiqûqiyê ji Amedê ber bi Enqerê li gel hevalên xwe dimeşe. Maruf Kartal serpêhatiya xwe ji Ajansa Welat (AW) re vegot.
‘Berê jî û îro jî li dijî bêhiqûqiyê tedikoşim’
Maruf Kartal diyar kir ku heta roja hat ixrackirin 24 salan bênavebr xebitî û got: “Di şeva 29ê Îlona 2015an de ez ji kar avêtim. Mirov di nava malbat û hevalên xwe de kêm dimine. Gelek tişt ji min re hatin gotin. Min berê jî li dijî bêhiqûqiyê liberxwe da, îro jî ez dîsa liberxwe didim. Dema ku ez ji kar hatim avêtin. Ez li mala xwe rûneniştim. Min bêhiqûqî qebûl nekir. Min di nava HDPê de pêywîr girt. Paşê jî di sala 2018an de ez hatim girtin. Ez du salan di girtîgehê de mam. Piştî ez hatim berdan, min dîsa di partiyê de xebitîm.”
Maruf Kartal destnîşan kir ku dema ew ji kar hat dûrxistin, gelek kêmasî kişandiye û aboriya wan qels maye û wiha axivî: “Heta ku azadiya tevahiya gelê me pêk neyê, em vegerin ser karê xwe jî em azad nabin. Ku ez têr bim û cîranên min bircî be nabe. Eger ez vegerim ser karê xwe û têr bim lê welatê min ne azad be ez vî tiştî qebûl nakim. Ez bêhiqûqiyê qebûl nakim. Serî natewînim. Em nabin hevkariya zilmê. Heta dawiyê em ê dijî bêhiqûqiyê bisekinin. Heta ku gelê me azad nebe ji me re jî azadî tune ye. Em azadiya welatê xwe pêk neynîn em venagerin ser karê xwe jî.”
