Amed – Endamê Konseya Navendî ya TTBê Mehmet Şerîf Demîr ku tev li komxebatê bû diyar kir ku pêvajoya heyî çiqas zû encam bigire dê ji bo tenduristiya gel jî ewqas baş be û got: “Heta ku aştî pêk neyê tenduristî jî baş nabe.”
Platforma Tenduristiyê ya Amedê bi dirûşma “Civaka Demokratîk û Tendurist” duh (20 Kanûnê) li Çand Amedê komxebatek li dar xist. Tenduristvanên ku ji gelek bajarên bakurê Kurdistanê û Tirkiyeyê beşdarî komxebatê bûn mijarên “Civaka Demokratîk û Pêkhateyên Tenduristiyê”, “Dewlet û komun çi ne?” û “Entegrasyona demokratîk çi ye?” , “Di pêvajoya entegrasyona demokratîk de rol, erk û berpirsyariyên me” nîqaş kirin. . Komxebat dê îro jî berdewam bike. Endamê Konseya Navendî ya Yekîtiya Bijîjkan a Tirk (TTB) Mehmet Şerîf Demîr û rêveberê Şaxa Sendîkaya Kedkarên Xizmetên Civakî û Tenduristiyê (SES) ya Enqereyê Nûrûllah Sîvlîm têkildarî komxebatê û pêvajoya heyî ji Ajansa Welat (AW) re axivîn.
‘Tenduristî ne tenê nexweşxane ne’
Şerîf Demîr diyar kir ji bo aştî û tenduristiyeke baş saziyên tenduristiyê her tiştî dikin û got: “Em weke qada tenduristiyê her dem difikirin ku em ji bo aştiyê dikarin çi bikin. Em dizanin di nava civakekê de aştî tune be tenduristî jî tune ye. Ev yek girêdayî hev e. Tenduristî ne tenê nexweşxane ne. Divê qada tenduristiyê li her qadê be. Ji bona wê em dibêjin bi tenê bedena mirovan baş be ji bo tenduristiyê ne bes e. Divê ji her aliyî ve mirov baş be. Kedkarên tenduristiyê di saziyên xwe de li ser vê mijarê gelek disekinin. Ji bo ku zilm xilas bibe, di dema nû de em ê çibikin ji bona wê em vê komxebatê li dar dixin. TTB di kongereya xwe de biryar girti bû ku ji bo aştiyê dest bi xebetan bike. Ji bo vê me ‘komên xebatê yên aştî û demokrasiyê’ ava kirin. Dawiyê hefteya borî jî li ser vê me komxebatek li dar xist. Em dizanin di rojekî de ev tevahî tişt pêk nayên ji bona wê xebatên me didomin.”
‘Em civakê çiqas tev li pêvajoyê bikin ewqas baş e’
Mehmet Şerîf Demîr destnîşan kir ew jî wekî TTB ji bo aştiyê xebatan dikin û wiha domand: “Ji bo ev pirsgirêk ji holê rabe pêvajoyek heye. Aliyê dewletê çi bike ew li ser milê wan e. Le divê em wekî tenduristvanan ji bo ev pêvajo ji civak û herkesî re baştir bibe divê li ser bisekinin. Em civakê çiqas tev li pêvajoyê bikin ewqas baş e. Wekî TTB û SES çi ji destê me were em ê bikin.”
‘Pêvajo encam bigire dê ji bo tenduristiyê jî baş bibe’
Mehmet Şerîf Demîr anî ziman ku ji bo tenduristiya civakê aştî pêwîst e û axaftina xwe wiha bi dawî kir: “Kesek azad nebe, nikare gotine xwe bi awayekî azad bibêje, tenduristiya wî kesî jî nebaş e. Heta ku aştî pêk neyê tenduristî jî dê pêk neyê. Ev pêvajoya nû çiqas bigihije encamê dê ji bo tenduristiyê jî ewqas baş be. Em ê bikarin aştiyê çiqas mezin bikin divê em li ser vê bisekinin.”
‘Ji bo pêşketina diyalogê em xebatên xwe dimeşînin’
Rêveberê Şaxa SESa Enqereyê Nurullah Sîvlîm jî diyar kir ku ji bo bi dawî bûna tundiyê ew li her platformê dixebitin û wiha got: “Ji bo pêşketina diyalogê em xebatên xwe dimeşînin. Bi entegrasyona demokratîk civakeke aştîperwer dê ava bibe. Di dîrokê de dema şer de xizmetên tenduristiyê hatine qutkirin. Ji bo wekî berê xizmetên tenduristiyê qut nebin em li vir in û xebatên me dê bimeşin. Di pêvajoya entegrasyonê de ji bo di xizmetên tenduristiyê de wekhevî û parastina zimanê zikmakî em ê xebatan bimeşînin.”
